უკრაინის პრეზიდენტმა, ვოლოდიმირ ზელენსკიმ განაცხადა, რომ სევეროდონეცკი უკრაინის შეიარაღებულ ძალებსა და რუსეთის საოკუპაციო ძალებს შორის დაპირისპირების ეპიცენტრად რჩება, სადაც დონბასის ბედი წყდება.
„სრულმასშტაბური ომის 105-ე დღეს, სევეროდონეცკი დონბასში დაპირისპირების ეპიცენტრად რჩება. ჩვენ ვიცავთ ჩვენს პოზიციებს და დიდ დანაკარგს ვაყენებთ მტერს“, – აღნიშნა უკრაინის პრეზიდენტმა.
ვოლოდიმირ ზელენსკის თქმით, ეს ძალიან სასტიკი და ძალიან რთული ბრძოლაა.
„ალბათ, ერთ-ერთი ყველაზე რთული ბრძოლაა ამ ომის განმავლობაში. მადლობელი ვარ თითოეული მათგანის, ვინც თავს იცავს ამ მიმართულებით. ბევრი თვალსაზრისით, ჩვენი დონბასის ბედი ახლა იქ წყდება“, – დასძინა უკრაინის სახელმწიფოს მეთაურმა.
კომენტარები