რეზოლუციაში მოყვანილი მტკიცებები, თითქოს, ნიკა გვარამია არის თავისუფალი მედია, გახლავთ სიცრუე და აბსოლუტურად არასწორი. თითქოს, მიხეილ სააკაშვილი არის საქართველოში დემოკრატიის გარანტი და დემოკრატიის სიმბოლო, ესეც თვალში ნაცრის შეყრაა ჩვენი საზოგადოებისთვის, – ამის შესახებ პარლამენტის ვიცე-სპიკერმა, არჩილ თალაკვაძემ განაცხადა.
მისი თქმით, ის, რომ რეზოლუციას მხარი არ დაუჭირა 200-ზე მეტმა ევროპარლამენტარმა, გარკვეულწილად იმაზე მეტყველებს, რამდენად სამართლიანადაა ის შედგენილი.
„ამ რეზოლუციას მხარი რომ არ დაუჭირა 200-ზე მეტმა ევროპარლამენტარმა, ესეც გარკვეულწილად მეტყველებს, თუ როგორ იყო ტექსტი მომზადებული და რამდენად სამართლიანია ის შინაარსი, რომელიც რეზოლუციაშია მოცემული. მიმაჩნია, რომ ეს არის მანიპულაცია. სააკაშვილის ჯანმრთელობის საკითხის პოლიტიზება და სპეკულაციები, რომელიც ამაზე იმართება ხელს უშლის ექიმებსა და სამედიცინო სამსახურს, რომ მან სრულყოფილად მიიღოს ის სამედიცინო მომსახურება, რომელსაც აწვდის სახელმწიფო“, – განაცხადა არჩილ თალაკვაძემ.