აშშ-ის ყოფილი სახელმწიფო მდივანი მაიკ პომპეო არ გამორიცხავს, რომ 2024 წელს შეიძლება აშშ-ის პრეზიდენტობისთვის იბრძოლოს. ამის შესახებ მან Radio Times-თან ინტერვიუში განაცხადა.
„თუ მე და ჩემი მეუღლე ჩავთვლით, რომ ვართ საჭირო ადამიანები იმისთვის, რათა ამერიკას წინ წარვუძღვეთ, ჩვენ აუცილებლად ჩავერთვებით ამ პროცესში“, – განაცხადა პომპეომ კითხვაზე, რომელიც ეხებოდა მის შესაძლო კენჭისყრას 2024 წლის საპრეზიდენტო არჩევნებზე.
მან ასევე ისაუბრა უკრაინაში მიმდინარე ომზე და აღნიშნა, რომ უკრაინელებს უნდა ჰქონდეთ საჭირო აღჭურვილობა იმისთვის, რომ საკუთარი სუვერენიტეტი დაიცვან.
„ეს არის აგრესია, ომი, რომელიც ვლადიმერ პუტინმა წამოიწყო. ჩვენ, კოლექტიურმა დასავლეთმა, უნდა მოვამარაგოთ უკრაინელები როგორც შეიარაღებით, ისე სადაზვერვო ინფორმაციით, რომელსაც ისინი გვთხოვენ“, – განაცხადა პომპეომ.
2018-2021 წლებში პომპეო დონალდ ტრამპის ადმინისტრაციაში სახელმწიფო მდივნის თანამდებობას იკავებდა, მანამდე კი ცენტრალური სადაზვერვო სააგენტოს (CIA) ხელმძღვანელი იყო.