ეუთოს „მოსკოვის მექანიზმის“ მეორე ანგარიშში, რომლის ფარგლებშიც შეიქმნა საექსპერტო მისია უკრაინაში რუსეთის შემოჭრის შედეგების შესასწავლად, დადასტურდა რუსი სამხედროების მიერ ჩადენილი სექსუალური ძალადობის განმეორებითი შემთხვევები. ასევე მშვიდობიანი მოსახლეობის, მათ შორის ბავშვების მასობრივი მკვლელობები – ამის შესახებ აშშ-ის ელჩმა ეუთოში მაიკლ კარპენტერმა განაცხადა.
მისი თქმით, ეუთოს მეორე ანგარიში, რომელიც 1 აპრილიდან 25 ივნისამდე პერიოდს მოიცავს, „მტკივნეული იყო წასაკითხად“. მან მოიყვანა ფრაგმენტები მოხსენებიდან, რომელიც ადასტურებს, რომ რუსი სამხედროები უკრაინის ქალაქებში სექსუალურ ძალადობას ახორციელებდნენ.
“მოხსენებაში ნათქვამია 23 წლის კარინა იერშოვას შემთხვევა ბუჩაში, რომელიც გაიტაცეს, გააუპატიურეს და აწამეს და ბოლოს დახვრიტეს რუსულმა ძალებმა. მოხსენებაში, ასევე, ნახსენებია სახალხო დამცველის, ლუდმილა დენისოვას მოხსენება იმის შესახებ, რომ 14-დან 24 წლამდე ასაკის 25 გოგონა ბუჩას სარდაფში იმყოფებოდნენ და ჯგუფურად გააუპატიურეს, რის შედეგადაც ცხრა დაორსულდა. მოხსენებაში ასევე ნათქვამია, ერთი წლის ბიჭზე სექსუალური ძალადობის შესახებ, ასევე 78 წლის ქალი გააუპატიურეს რუსმა სამხედროებმა“, – ამბობს კარპენტერი.
მისია ბუჩასა და ირპინს ეწვია კიევის რეგიონში. მისიის წევრები აცხადებენ, რომ ამ ქალაქებში განვითარებული მოვლენები „საერთაშორისო ჰუმანიტარული სამართლის დარღვევის თვალსაჩინო მაგალითებია“ და „ასახავს ომის დანაშაულებს“.
კარპენტერის თქმით, ანგარიში ადასტურებს, რომ რუსეთის ჯარებმა ჩაიდინეს დანაშაული კაცობრიობის წინააღმდეგ.