მსახიობმა ნინო გაჩეჩილაძემ გადაცემაში “ბაიასთან” პირად ცხოვრებაზე და ასევე საზოგადოების დიდი ნაწილისთვის საყვარელ სერიალზე “ჩემი ცოლის დაქალებსა” და თავის გმირზე, კატოზე ისაუბრა.
მის თქმით, პირად ცხოვრებაში რაც უფრო მეტი დათმო, უფრო მეტი შეცდომა დაუშვა:
“რაც უფრო მეტი დავთმე, თუნდაც პირად ცხოვრებაში, მით მეტი შეცდომა დავუშვი. ადამიანმა, ამ შემთხვევაში ქალმა, როცა იცის რომ მართალია, პირველ რიგში საკუთარ თავთან და მერე სხვა ადამიანთან, არ უნდა წავიდეს დათმობაზე, თუნდაც იმიტომ, რომ ვიღაცა სხვას ასიამოვნოს ამით. თითქოს მე ყველაფერს სწორად ვაკეთებ, მაგრამ გარშემო ყველაფერი ისე არ არის, როგორც შენ გინდა“, – ამბობს ნინო გაჩეჩილაძე.
მსახიობის თქმით, მისმა გმირმა ჩცდ-ში, კატომ პირველი სეზონიდან, ბოლო მე-18 სეზონამდე დიდი ტრანსფორმაცია განიცადა:
“ძალიან მომწონს ის, თუ როგორ წაიყვანა სცენარისტმა კატოს სახე, თუ როგორ შეიძლება არასწორმა მამაკაცმა და არასწორმა პარტნიორმა, ასეთი სიცოცხლით სავსე, სიცოცხლისმოყვარე, ლაღი და მხიარული ადამიანი აბსოლუტურად შეცვალოს, დააკნინოს, დააჩმოროს, იძულებით დაამდაბლებინოს თავი იმის შიშით რომ ეს ქალი საბოლოოდ მარტო არ დარჩეს.
როდესაც ეს შიში აღარ იქნება ქალებში – ბოლო შანსი ხომ არ არის და მარტო ხომ არ დვარჩები, ამის შემდეგ, ეს პრობლემაც მოიხსნება.
ურთიერთობაში თუ არ არის ჰარმონია, მაშინ რა აზრი აქვს ამ ურთიერთობის გაგრძელებას?! ვინც უნდა იყოს არ აქვს მნიშვნელობა პერსონაჟი იქნება, თუ რეალური ადამიანი, ყველა შინაგანად უნდა მიხვდეს, მე არასწორ ადამიანთან ვარ ურთიერთობაში და სჯობს, გავჩერდე, იმიტომ რომ მერე ამას მიჰყავს ადამიანები ზუსტად იმ შედეგებამდე, რა შედეგამდეც მივიდა კატო. ბოლოს გადასარჩენი გახდა.
ძალადობის სცენის შემდეგ მომწერა რამდენიმე ქალმა, რომელმაც თავი დააღწია მოძალადე მამაკაცს. პირდაპირ კარი გავაღე და გავუძახე სახლიდანო – მე ტაში დავუკარი და ვუთხარი, ყოჩაღ, მე ვისურვებდი ბევრ ქალს მოებაძა თქვენთის-თქო”, – ამბობს გაჩეჩილაძე.