როდესაც ქვეყნის 20% ოკუპირებულია, როდესაც რუსეთი, ერთი მხრივ, გვეუბნება, რომ ჩვენი იურისდიქცია მათ მიერ ოკუპირებამდე არსებულ ტერიტორიაზეა აღიარებული და მიუხედავად ამისა, ჩვენ შეზღუდულები ვართ იქ რაიმე მსახურება შევასრულოთ, სასულიერო პირები ჩადიოდნენ და პირიქით, ვხედავთ, რომ შეუფერებელი განცხადებებია – მილოცვები არჩევნებში გამარჯვებული დე-ფაქტოლიდერების მიმართ, იქ სასულიერო პირები ჩადიან, მსახურებას აღასრულებენ, როგორ შეიძლება ამ ფონზე გვქონდეს განწყობა, რომ რუსეთთან ყოფნა ჯობია? – ამის შესახებ საპატრიარქოს საზოგადოებასთან ურთიერთობის სამსახურის ხელმძღვანელმა, დეკანოზმა ანდრია ჯაღმაიძემ გადაცემაში „ნოესთან“ განაცხადა.
მან ქვეყნის ევროინტეგრაციაზე ისაუბრა და აღნიშნა, რომ ადრე ევროკავშირის წარმომადგენლები საპატრიარქოში გამართულ შეხვედრებზე ამბობდნენ, რომ ევროკავშირში შესვლა ტრადიციების უგულებელყოფას არ ნიშნავს და ამ ფონზე პატრიარქს არაერთი განცხადება გაუკეთებია, რომ ევროპული სტრუქტურები საქართველოს არჩევანია.
„მაგრამ, სამწუხაროდ, დამოკიდებულება შეიცვალა. ბოლო დროს, ევროპის ქვეყნების ელჩებმა სხვა პოზიცია დააფიქსირეს და ლგბტ-უფლებები და ე.წ. მსვლელობები და მარშები ამის აუცილებელ პირობად გახადეს“, – განაცხადა ჯაღმაიძემ.