გუდაურში ჩამოვარდნილი ვერტმფრენის ეკიპაჟის ერთ-ერთი წევრი წარმოშობით ახმეტის მუნიციპალიტეტის სოფელ ზემო ალვანიდანაა. 43 წლის დიმა ქააძეს თბილისის საავიაციო სასწავლებელი აქვს დამთავრებული. ახლობლები ამბობენ, რომ მან კვალიფიკაცია უკრაინაში აიმაღლა.
„როგორც ვიცი, უკრაინაში აიმაღლა კვალიფიკაცია. მისი ძმაც მფრინავია. საერთოდაც, ალვანიდან ძალიან ბევრი ახალგაზრდა დაადგა ამ გზას. დიმა არაჩვეულებრივი ადამიანი, კარგი მეგობარი და თავის საქმეზე შეყვარებული კაცი იყო. 2013 წლამდე თავდაცვის სამინისტროშიც მუშაობდა. ალვანში მამიდა ჰყავს. უმძიმესი ამბავია, რა გითხრათ, არც ვიცი”. – ამბობს ალვანში ერთ-ერთი ადგილობრივი.
შეგახსენებთ, დღეს, გუდაურის მიმდებარე ტერიტორიაზე, პარაპლანით ფრენის დროს, 2 პირი კლდოვან ფერდობზე ჩამოვარდა. სამაშველო ოპერაციაში სასაზღვრო პოლიციის კუთვნილი ვერტმფრენი ჩაერთო, რომელმაც ღონისძიების მიმდინარეობისას მართვა დაკარგა, ჩამოვარდა და აფეთქდა. შინაგან საქმეთა სამინისტროს ინფორმაციით, ეკიპაჟი 8 წევრისგან შედგებოდა, რომელთა შორის ოთხი პილოტი, ორი მაშველი და ორი მედიკოსი იყო. გამოძიება მომხდარ ფაქტზე, სისხლის სამართლის კოდექსის 275- ე მუხლით დაიწყო, რაც საჰაერო ტრანსპორტის ექსპლუატაციის წესების დარღვევას გულისხმობს.