საზოგადოება დაიღალა ასეთი სახის შეტევებით საქართველოს მოსახლეობის წინააღმდეგ. სერიოზულად კომენტარის გაკეთებაც კი მიჭირს, – ამის შესახებ პარლამენტის თავმჯდომარე შალვა პაპუაშვილმა განაცხადა უკრაინის ეროვნული უსაფრთხოებისა და თავდაცვის საბჭოს მდივან ოლექსეი დანილოვის განცხადების კომენტირებისას.
„ამ კრიზისულ პერიოდში, როდესაც რეგიონი ამხელა გამოწვევის წინაშე დგას, ყველამ დაინახა თუ რამხელა რისკის წინაშე იდგა და კვლავ დგას საქართველო, რაც შეეხება მათ შორის პირდაპირ სამხედრო კონფლიქტში ჩართვას რუსეთთან და ყველამ ნახა რა ძალისხმევა იდებოდა ამისთვის; დღემდე მთელი შტურმი მიდის ჰიბრიდული ომისა, რაც არის დეზინფორმაციის გავრცელება საქართველოს და ქართველი ხალხის წინააღმდეგ. სულ თავიდან რომ დავიწყოთ – რძის პროდუქტების გვერდის ავლით გატანა, სამხედრო თვითმფრინავის გადაფრენა, სანქციებისთვის გვერდის ავლა, გემების შემოსვლა და ტვირთების გადმოზიდვა, – ეს ყველაფერი აღმოჩნდა ტყუილი, რისი მიზანიცაა საქართველოს რეპუტაციის შელახვა, მღელვარების გამოწვევა საზოგადოებაში, შერყევა ხელისუფლების, იმისთვის, რომ შეიცვალოს ხელისუფლება, რომ სამხედრო კონფლიქტში ჩათრეული აღმოჩნდეს საქართველო“, – განაცხადა პაპუაშვილმა.