ჩვენ, არც ადრე და არც ახლა, კითხვებს არ ვსვამდით და არც ვსვამთ, მაგრამ რადგან მის მიმართ კითხვები დაისვა, ჩვენი გულწრფელი რჩევა იყო, რომ ამ კითხვებზე პასუხები გაცემულიყო, რომ შემდეგ ცუდი გაგრძელებები არ მოჰყოლოდა. თუმცა, ასეთი მკაფიო პასუხები ვერ გავიგეთ, – ამის შესახებ „ქართული ოცნების“ აღმასრულებელმა მდივანმა მამუკა მდინარაძემ აშშ-ის ელჩზე, კელი დეგნანზე საუბრისას განაცხადა. მან აღნიშნა, რომ კითხვების დასმა და მათზე პასუხების მოთხოვნა თავმოყვარე სახელმწიფოში თავდასხმად არ უნდა განიხილებოდეს, ვისი მისამართითაც არ უნდა დაისვას კითხვა.
„მაგრამ, ჩვენ თუ სახელმწიფო ვართ და თქვენც თუ ამაში მიერთდებით, რომ ვართ სახელმწიფო, კითხვების დასმა და მასზე პასუხის მოთხოვნა, თუ რჩევა, თავმოყვარე სახელმწიფოში თავდასხმად არ უნდა განიხილებოდეს და თავმოყვარე პოლიტიკოსებმა ეს არ უნდა ილაპარაკონ. სამწუხაროდ, დღეს საქართველოში არიან პოლიტიკოსები, რომლებიც ამბობენ, რომ ეს არის თავდასხმა. ქვეყნის გარეთ ვიღაცამ რომ შეაფასოს, ეს გასაგებია, მან შეიძლება სუბიექტურად დაიცვას თავისი მეგობარი, ეს აბსოლუტურად გასაგებია. მაგრამ ქართველი, როდესაც კითხვის დასმას, რადგან ამერიკის ელჩია, უწოდებს თავდასხმას, ეს თავმოყვარე სახელმწიფოს წარმომადგენელმა, ოპოზიციის კი არა, ვინც არ უნდა იყო, არ უნდა თქვა. დიახ, ჩვენი სტრატეგიული პარტნიორი, მეგობარი ქვეყნის, რომელსაც დიდი დამსახურება აქვს ამ ქვეყნის წინაშე მის მიმართ კითხვის დასმას, თავდასხმა დაარქვა, ეს თავმოყვარე სახელმწიფოში არც ოპოზიციონერმა და არც ხელისუფლების წარმომადგენელმა ასე არ უნდა იკადროს“, – განაცხადა მდინარაძემ.