უკრაინელმა სამხედროებმა ქალაქ ხერსონის მახლობლად რუსი ოკუპანტებისგან ოთხი სოფელი გაათავისუფლეს. ამის შესახებ ინფორმაციას ამერიკული ტელეკომპანია „სიენენი“ უკრაინის შეიარაღებულ ძალებში საკუთარ წყაროზე დაყრდნობით ავრცელებს.
არსებული ცნობით, გათავისუფლებული სოფლებია ახალი დმიტროვკა, არხანგელსკოე, ტომინა ბალკა და პრავდინო.
„ოპერაცია დაიწყო ღამით რუსული პოზიციებისა და ზურგის მასიური დაბომბვით“, – განუცხადა წყარომ მედიასაშუალებას ანონიმურად.
წყაროს ცნობით, შეტევის ძირითადი მიმართულება იყო დასახლება პრავდინო. უკრაინელმა სამხედროებმა იერიში მიიტანეს დონეცკისა და ლუგანსკის ე.წ. რესპუბლიკის ქვეითებზე, რომლებიც გაიქცნენ. „სიენენის“ წყაროს ცნობით, ასევე გაიქცა რუსული დესანტი.
არსებული ცნობებით, უკრაინის შეიარაღებულმა ძალებმა ოკუპანტების თავდაცვის ხაზი სამ ადგილას გაარღვიეს. უკრაინული ძალების მთავარი სამიზნე ქალაქი ხერსონია.
„სიენენის“ წყაროს ინფორმაციით, მოკლულია და ტყვედ აყვანილია ბევრი ოკუპანტი. ასევე, განადგურებულია რუსული სამხედრო ტექნიკა.
ამასთან, უკრაინული სააგენტო „უნიანი“ წერს, რომ ხერსონის ოლქში ისმის აფეთქებების ხმა. მედიასაშუალება აღნიშნავს, რომ არსებული ინფორმაციით, უკრაინის შეიარაღებულმა ძალებმა ანტონოვსკის ხიდთან ოკუპანტების ბარჟა დაბომბეს, ასევე იერიში მიიტანეს ახალ კახოვკაში რუსების საბრძოლო მასალების საწყობზე.