უკრაინის არმიამ ქვეყნის სამხრეთში რამდენიმე დასახლებული პუნქტი გაათავისუფლა. უკრაინული მედიის ცნობით, გათავისუფლებული ტერიტორიების შესახებ ინფორმაცია მოგვიანებით გახდება ცნობილი, რათა არ მოხდეს ოკუპანტების მიერ მასიური დაბომბვა.
უკრაინის არმიის გენშტაბის ინფორმაციით, უკრაინის შეიარაღებული ძალების სამხედროებმა გაანადგურეს მტრის ცოცხალი ძალის მნიშვნელოვანი რაოდენობა დონეცკისა და იუჟნობუგის მიმართულებით.
ამასთან, უკრაინული მედია წერს, რომ სახმელეთო დაჯგუფებების მოქმედებების მხარდასაჭერად, უკრაინის თავდაცვის ძალების ავიაციამ განახორციელა 10-მდე დარტყმა, რომლის დროსაც განადგურდა რუსული სამხედრო ტექნიკა და საჰაერო თავდაცვის სისტემები. გასული დღის განმავლობაში რუსმა სამხედროებმა რუსეთის ტერიტორიიდან სუმის რაიონის რამდენიმე სასაზღვრო თემს, 140 ნაღმი და ჭურვი ესროლეს.
უკრაინული მედია წერს, რომ რუსულმა სტრატეგიულმა ავიაციამ უკრაინის ქალაქი კრივოი როგი კასპიის ზღვის ჩრდილოეთ ნაწილიდან ნასროლი რაკეტით დაბომბა. დაბომბვის შედეგად ხანძარი ნავთობბაზის ტერიტორიაზე გაჩნდა.