საქართველოსთვის ევროპული პერსპექტივის მნიშვნელობაზე ისაუბრა იუსტიციის მინისტრმა რატი ბრეგაძემ ბუნდესტაგში გამართულ შეხვედრაზე. რატი ბრეგაძე ბუნდესტაგში გერმანია-სამხრეთ კავკასიის საპარლამენტო მეგობრობის ჯგუფის ხელმძღვანელ იოჰან დეივიდ ვადეფულს შეხვდა, – ამის შესახებ ინფორმაციას იუსტიციის სამინისტრო ავრცელებს.
მათივე ინფორმაციით, შეხვედრაში, ასევე, მონაწილეობდნენ მინისტრის პირველი მოადგილე თამარ ტყეშელაშვილი, მოადგილეები ბუბა ლომუაშვილი, ბექა ძამაშვილი და გერმანიაში საქართველოს ელჩი ლევან იზორია.
იუსტიციის მინისტრმა შეხვედრაზე აღნიშნა, რომ სექტორული თანამშრომლობა და ბუნდესტაგთან მუშაობის გაღრმავება მნიშვნელოვანი საკითხია საქართველოს ევროინტეგრაციის პროცესში.
იუსტიციის სამინისტროს დელეგაციის ვიზიტი გერმანიაში 6 სექტემბერს დაიწყო. ვიზიტის ფარგლებში შეხვედრები გაიმართა გერმანიის იუსტიციის მინისტრთან, ნოტარიუსთა პალატის პრეზიდენტთან, ბუნდესტაგის იურიდიული კომიტეტის თავმჯდომარესთან, პენიტენციური და პრობაციის სისტემების ხელმძღვანელებთან. ასევე, შეხვედრა გაიმართა ჰუმბოლდტის უნივერსიტეტშიც.