არ ვიცი, საიდან დამკვიდრდა სტერეოტიპი, ოპოზიციაში თუ ხარ, რაც არ უნდა კარგი მოხდეს, ცუდი უნდა ილაპარაკო. ეს ასე არ უნდა იყოს. ჩვენ, მთელი ოპოზიცია ვითხოვდით ამ ელექტრონულ ხმის მთვლელ აპარატებს, – ამის შესახებ პარტია „მოქალაქეების“ ლიდერმა, დეპუტატმა ალეკო ელისაშვილმა განაცხადა.
„ქართულმა ოცნებამ“ ძლივს ამოღერღა რაღაც კარგი და სწორი თქვა, რომ უბნების 70%-ზე იქნება ასეთი აპარატები. იცით, ეს რას ნიშნავს? ავიღოთ რუსთავის და ბათუმის ბოლო შუალედური არჩევნები – ერთი საჩივარი არ დაწერილა, იმიტომ რომ როდესაც საარჩევნო უბანი საღამოს დაიხურა, 10 წუთში ამოიბეჭდა ქვითარი ამ აპარატიდან, ვინ რამდენი მიიღო, და ეს ეჭვგარეშე იყო. პირველი – ხმის მთვლელი აპარატები არ ნიშნავს ელექტრონულ არჩევნებს, და მეორე – ყველა პრობლემას ეს ვერ მოაგვარებს. არც არჩევნების გაყალბებისგან დაგაზღვევს, არც საარჩევნო ზეწოლისგან – ერთიც და მეორეც არჩევნების დღემდე ხდება. უბრალოდ, ერთ-ერთი „აქილევსის ქუსლი“, რაც ახლდა ჩვენს არჩევნებს, რომ უბანი დაიხურებოდა და მეორე დილამდე შედეგები არ ვიცოდით, ეს დამთავრდება. 20:15 საათზე უბნების 70%-ზე გვექნება შედეგი“, – აცხადებს ელისაშვილი.