ელექტრონული ტექნოლოგიების დანერგვით, ყოველგვარი საბაბი სპეკულაციებისთვის, ინსინუაციებისთვის მოიხსნება, – ამის შესახებ „ქართული ოცნების“ თავმჯდომარემ, ირაკლი კობახიძემ საქართველოს პირველი არხის გადაცემაში „თავისუფალი ხედვა“ განაცხადა.
„არის მნიშვნელოვანი რეფორმები, რომლებიც ხორციელდება, მათ შორის 12 პუნქტის ფარგლებში. ერთ-ერთი მნიშვნელოვანი არის საარჩევნო რეფორმა. უკვე წარდგენილია პარლამენტში შესაბამისი კანონპროექტი ინიციატივის წესით. ჯამში იყო ეუთო/ოდირის 19 რეკომენდაცია, რომლის შესასრულებლადაც მუშაობდა სამუშაო ჯგუფი. ერთ-ერთი მნიშვნელოვანი რეკომენდაცია, რომელიც ძირითადად ოპოზიციიდან და არასამთავრობო სექტორიდან წამოვიდა, უკავშირდებოდა ელექტრონული წესით ხმის მიცემას და ასევე ამომრჩეველთა რეგისტრაციას.
მთლიანად პაკეტი არის მნიშვნელოვანი, მაგრამ ცალკე გამოვყოფ ელექტრონული ტექნოლოგიების დანერგვის საკითხს. ბევრი კუთხით არის ეს ინიციატივა მნიშვნელოვანი, რასაც ჩვენ საბოლოო ჯამში მხარი დავუჭირეთ. ყოველგვარი საბაბი სპეკულაციებისთვის, ინსინუაციებისთვის მოიხსნება ამ ელექტრონული ტექნოლოგიების დანერგვით. მაგალითად, რეგისტრაციის საკითხი რომ ავიღოთ ცალკე, იყო ყბადაღებული თემა, ე.წ. საარჩევნო კარუსელის შესახებ, რაზეც იყო ბრალდებები, ნულოვანი საბაბი დარჩება ამ შემთხვევაში ოპოზიციას“, – აღნიშნა კობახიძემ.
13 სექტემბერს, „ქართული ოცნების“ თავმჯდომარემ, ირაკლი კობახიძემ განაცხადა, რომ „ქართული ოცნების“ ინიციატივით, საქართველოში არჩევნები ელექტრონულად ჩატარდება.