რუსეთის პრეზიდენტის, ვლადიმერ პუტინის პოლიტიკური ოპონენტები, პირველად,ლ ორი ათწლეულის განმავლობაში, მის გადადგომას სავარაუდოდ მიიჩნევენ. უკრაინაში წარუმატებლობის ფონზე, რუსეთში უკვე აქტიურად მსჯელობენ იმაზე, თუ ვინ შეძლებს კრემლის ლიდერის ჩანაცვლებას.
ამის შესახებ Politico წერს.
სტატიაში ნათქვამია, რომ უკრაინის ომი პუტინის წინააღმდეგ მუშაობს და ძირს უთხრის მის უძლეველობას. რუსეთის ხელმძღვანელობაში შიდა ბრძოლა დაიწყო და გამოჩნდნენ ისეთები, ვინც აკრიტიკებს სამხედრო-პოლიტიკური სარდლობის ქმედებებს.
“როგორც ჩანს, ჩინოვნიკები ცვალებადი პოლიტიკური ლანდშაფტით სარგებლობას ცდილობენ. კრემლში წყაროები ამტკიცებენ, რომ რუსული ელიტის მხრიდან, კერძოდ, ჩეჩნეთის ლიდერის, რამზან კადიროვისა და “ვაგნერის” ჯგუფის ლიდერის, ევგენი პრიგოჟინის მხრიდან საჯარო უთანხმოება გაჟღერდა”, – ნათქვამია სტატიაში.
რუსეთის ყოფილი პრემიერმინისტრი, მიხაილ კასიანოვი დარწმუნებულია, რომ პრეზიდენტის ძალაუფლება შესაძლოა, მოულოდნელად შესუსტდეს.
”მე ვფიქრობ, რომ 3-4 თვეში კარდინალური ცვლილებები მოხდება”, – თქვა მან.
პუტინის სხვა ოპონენტები პროგნოზებს გაურბიან, მაგრამ თითქმის დარწმუნებული არიან, რომ ომი პუტინისთვის გარდამტეხი იქნება და მისი დასასრულის დასაწყისი.
Politico წერს, რომ კადიროვი და პრიგოჟინი თავს არიდებდნენ პუტინის პირდაპირ კრიტიკას, რაც კრემლს ხელს აძლევდა, წარუმატებლობაზე პასუხისმგებლობა თავდაცვის სამინისტროსა და გენერლებზე დაეკისრებინა. პუტინი ამ სტრატეგიას ნაწილობრივ უკვე ახორციელებს, წარუმატებლობისთვის თავდაცვის სამინისტროს საყვედურობს.
თუმცა, კრიტიკის მიუხედავად, პუტინი არც პრიგოჟინს და არც კადიროვს არ საყვედურობს და პირიქით, კადიროვმა ცოტა ხნის წინ, გენერალ-პოლკოვნიკის წოდება მიიღო.
რუსი მეწარმე და ოპოზიციონერი, მიხაილ ხოდორკოვსკი ამბობს, რომ რუსეთში ძალაუფლებისთვის შიდა ბრძოლის აშკარა ნიშნებია ორ ალიანსს შორის: “ომის პარტიას” – კადიროვისა და პრიგოჟინის მეთაურობით და მოწინააღმდეგეთა ფრაქციას შორის, რომელიც შედგება უსაფრთხოების ორგანოებისგან – სერგეი შოიგუსგან და გენშტაბის უფროსისგან – ვალერი გერასიმოვისგან. ომში წარუმატებლობის შემთხვევაში ხოდორკოვსი მოვლენების განვითარების ორ სცენარს ასახელებს.
პირველი სცენარის მიხედვით, ბანაკები გაერთიანდებიან და პუტინის გადადგომას მოითხოვენ. პრემიერმინისტრი, მიხაილ მიშუსტინი რუსეთის ფედერაციის ახალი ლიდერი გახდება და დაიწყება ბრძოლა იმაზე, თუ ვინ გააკონტროლებს მას.
მეორე სცენარის მიხედვით, კონკურენტ ალიანსებს შორის დაპირისპირება მოხდება. ამავდროულად, ხოდორკოვსკი არ არის დარწმუნებული, რომ პუტინი შეძლებს გადაურჩეს თავისი ომის შედეგებს.
“მე მას აღარ მივიჩნევ პრაგმატულ ადამიანად. ის სულ უფრო საკუთარ ემოციებს ეყრდნობა”, – აღნიშნა ხოდარკოვსკიმ.