მნიშვნელოვანია, რომ „ნაციონალური მოძრაობა“ იყოს ზეაქტიური, რათა ოპოზიცია დაბრუნდეს ქართულ პოლიტიკაში უფრო ძლიერი, ცხადია, – ამის შესახებ „ნაციონალური მოძრაობის“ თავმჯდომარეობის კანდიდატმა, ლევან ხაბეიშვილმა განაცხადა.
„ვაპირებ, საქართველოს ყველა რეგიონში ჩავიდეს არა მარტო ახლა, საარჩევნო კამპანიის დროს, არამედ ზოგადად. მე არავისზე გამარჯვებას არ ვაპირებ. მე ვაპირებ გაძლიერდეს „ნაციონალური მოძრაობა“, – განაცხადა ხაბეიშვილმა.
„ნაციონალური მოძრაობის“ პარტიის თავმჯდომარეობისთვის სამი კანდიდატი იბრძოლებს – ლევან ხაბეიშვილი, ნიკა მელია და გიორგი მუმლაძე, თუმცა არ არის გამორიცხული საკუთარი კანდიდატურა ხატია დეკანოიძემაც დააყენოს. ამ გადაწყვეტილების შესახებ დეკანოიძე სავარაუდოდ, რამდენიმე დღეში, ბრიუსელიდან დაბრუნების შემდეგ ისაუბრებს. შიდაპარტიული არჩევნები „ნაციონალურ მოძრაობაში“ დაახლოებით, სამ კვირაში ჩატარდება. როგორც მელიას, ისე ხაბეიშვილის მხარდამჭერები ამბობენ, რომ არჩევნები, მიუხედავად შედეგისა, პარტიის ორად გაყოფის მიზეზი არ გახდება. „ქართულ ოცნებაში“ კი აცხადებენ, რომ „ნაციონალურ მოძრაობაში“ ახლა კლანებს შორის ძალაუფლების გადანაწილების პროცესი მიმდინარეობს.