პოლონეთის პრემიერმინისტრის, მატეუშ მორავეცკის თქმით, პოლონეთის სოფლებში ჩამოვარდნილი რაკეტები იმის მტკიცებულებაა, რომ თუ უკრაინა არ მიიღებს მეტ მხარდაჭერას, ომი პოლონეთის ტერიტორიაზეც გავრცელდება.
“ჩვენ დანამდვილებით არ ვიცით ინციდენტის ზუსტი გარემოება ან მიზეზი, მაგრამ ჩვენ ვიცით მომხდარის გამომწვევი ძირეული მიზეზი – ეს არის რუსეთის აგრესია უკრაინის წინააღმდეგ”, – თქვა მან.
პოლონურ რადიოსთან საუბარში მან აღნიშნა, რომ “დღეს პოლონეთის ომში ჩართვის ერთადერთი გზა არსებობს – ეს არის ზურგი აქციო უკრაინას”, მისი თქმით, ასეთ შემთხვევაში უკრაინა რუსეთზე კრიტიკულად დამოკიდებული გახდება.
“თუ უკრაინა ასეთ დამოკიდებულებაში მოხვდება, ჩვენ არაფერი დაგვჭირდება ომის პროვოცირებისთვის – ის ჩვენთან თავისით მოვა. პუტინი არ გაჩერდება, კრემლი უფრო შორს წავა, პასიურად ყოფნა ჩვენთვის სუიციდს ნიშნავს”, – თქვა მატეუშ მორავეცკიმ.
ცნობისთვის, 15 ნოემბერს, პოლონეთში, უკრაინის საზღვართან ახლოს, სოფელ პრჟედვოდოვში რაკეტა ჩამოვარდა, რის შედეგადაც ორი ადამიანი დაიღუპა. ეს იყო პირველი შემთხვევა, როცა უკრაინაში რუსეთის შეჭრის შემდეგ, რაკეტა NATO-ს წევრი ქვეყნის ტერიტორიაზე ჩამოვარდა. პოლონეთის განცხადებით, არ არსებობს არანაირი მტკიცებულება, რომ აღნიშნული პოლონეთზე მიზანმიმართული თავდასხმა იყო.
პოლონეთსა და დასავლეთში ამბობენ, რომ დიდი ალბათობით პოლონეთის ტერიტორიაზე ჩამოვარდნილი რაკეტა უკრაინის მხრიდან თავდაცვისთვის იყო გამოყენებული, თუმცა აღნიშნავენ, რომ მომხდარზე სრული პასუხისმგებლობა რუსეთს ეკისრება.
ადგილზე ექსპერტებმა საგამოძიებო მოქმედებები დაიწყეს, რომელშიც უკრაინაც ჩართულია.