უკრაინის პრეზიდენტმა ვოლოდიმირ ზელენსკიმ ტრადიციულ ღამის მიმართვაში განაცხადა, რომ მუშაობა გრძელდება ელექტროენერგიის აღდგენის მიზნით იმ ადგილებში, რომელთა ინფრასტრუქტურაც ამ კვირაში რუსული დარტყმების სამიზნე იყო.
„ჩვენ ვმუშაობთ მთელი ქვეყნის მასშტაბით სიტუაციის სტაბილიზაციისთვის“, – განაცხადა მან.
„ელექტროენერგიაზე ყველაზე მეტი პრობლემაა ქალაქ კიევსა და კიევის ოლქში, ქალაქ ოდესასა და ოდესის ოლქში, ქალაქ ხარკოვსა და ხარკოვის ოლქში. ვინიცია, ტერნოპოლი, ჩერკასი, ჩერნიგოვი და სხვა რეგიონები – ენერგეტიკის მუშაკები ყველაფერს აკეთებენ იმისათვის, რომ ხალხს ნორმალური ცხოვრების საშუალება მიეცეს“, – დასძინა მან.
ზელენსკიმ ასევე მადლობა გადაუხადა დიდი ბრიტანეთის პრემიერ მინისტრს რიში სუნაკს კიევში მასთან გამართული შეხვედრისთვის.
„გმადლობთ, რიში, ბატონო პრემიერ-მინისტრო, თქვენი მზადყოფნისთვის, რომ კიდევ უფრო მტკიცედ დაიცვათ თავისუფლება ჩვენთან ერთად“, – განაცხადა ზელენსკიმ.