უკრაინაში რუსეთის ომის დასაწყისში პრეზიდენტმა ვლადიმერ პუტინმა ჩეჩნეთის ლიდერს, რამზან კადიროვს კიევში სამთავრობო შენობების დაკავება და ვოლოდიმირ ზელენსკის მოკვლა უბრძანა. ამის შესახებ The Wall street journal უკრაინის დაზვერვისა და უსაფრთხოების ჩინოვნიკებზე დაყრდნობით წერს.
მედიის ცნობით, კრემლის პრესსპიკერმა დიმიტრი პესკოვმა ინფორმაციას “სრული აბსურდი, უსაფუძვლო და ყალბი” უწოდა. ხოლო თავად კადიროვმა მედიასთან კომენტარი არ გააკეთა.
გამოცემა წერს, რომ კადიროვის ჯარები უკრაინაში ომის დაწყების მეორე დღეს, 25 თებერვალს მძიმედ შეიარაღებული პერსონალის სამი კოლონით შევიდნენ. ეს მომენტი უკრაინის დაზვერვამ გადაიღო, მასში ჩანს რომ კადიროვის ერთ-ერთმა მაღალჩინოსანმა “მისიის” დაწყების შესახებ ჩეჩნეთის ლიდერს ინფორმაცია მიაწოდა.
ვიდეოში ისმის ხმა- “დრო ზუსტად 00:00 საათია, ჩვენ ვიწყებთ მოძრაობას.1 500-ზე მეტი პერსონალი, საუკეთესო სპეცრაზმი, საუკეთესო მებრძოლები”.
გამოცემის თანახმად, მოგვიანებით პირველი კოლონა კიევის მისადგომებთან თითქმის მთლიანად გაანადგურეს, დანარჩენი ორი კი იძულებული გახდა, გადაჯგუფების მიზნით წინსვლა შეეწყვიტა.