შეერთებული შტატების მიერ უკრაინისათვის გაწეული დახმარების გასაკონტროლებლად კიევში ამერიკელი აუდიტორები იმყოფებიან. ამის შესახებ სახელმწიფო მდივნის მოადგილემ, ვიქტორია ნულანდმა სენატში მოსმენის დროს განაცხადა. მისი თქმით, ვაშინგტონი განაგრძობს უკრაინის დახმარებას რეფორმებისა და ანტიკორუფციული ზომების გასატარებლად. ვიქტორია ნულანდმა რუსეთის წინააღმდეგ დაწესებული სანქციების შერბილებაზეც ისაუბრა. მისი თქმით, აშშ მზადაა შეამსუბუქოს რუსეთის წინააღმდეგ დაწესებული სანქციები იმ შემთხვევაში, თუ რუსეთი უკრაინიდან ჯარს გაიყვანს.
„ადმინისტრაცია მომავალშიც კონცენტრირებული იქნება იმაზე, რომ არ დაუშვას დახმარებისა და იარაღის არამიზნობრივად გამოყენება. ჩვენ ვთანამშრომლობთ მსოფლიო ბანკთან, საკონსულტაციო კომპანია „დელოიტთან“ და შეერთებული შტატების სამთავრობო აუდიტორების ჯგუფთან, რომლებიც კიევში იმყოფებიან“, – განაცხადა აშშ სახელმწიფო მდივნის მოადგილემ.