თავდაცვის მინისტრმა ჯუანშერ ბურჭულაძემ „ქრონიკაში“ ისაუბრა შავ პიარზე, რომელიც ბოლო პერიოდში მის წინააღმდეგ, ოჯახისა და უწყებებისადმია მიმართული.
„რა თქმა უნდა, პირველ რიგში მაღალი ავტორიტეტის მქონე ინსტიტუციის დისკრედიტაციაა და ამავდროულად, ჩემი დისკრედიტაციაც. ურთიერთგამომრიცხავია – ერთხელ აკეთებენ გადაცემას, რომ დედაჩემი ფლობს 95 წლიდან შპს-ებს, იურიდიულ პირებს, სადაც მფლობელობაშია კომერციული ფართები რუსთაველზე და ა.შ. და მართლაც ასეა. ჩემს ოჯახს არასდროს ჰქონია საბედნიეროდ ფინანსური გაჭირვება და ყოველთვის ბიზნესები ჰქონდა მამის მხარესაც და დედის მხარესაც. მეორეს მხრივ – ამბობენ, რომ ჩემი ბინა, სადაც ახლა ვცხოვრობ და 2008 წელს მაქვს შეძენილი, ჩემს მეუღლეზეა გაფორმებული და ამით აჩვენებენ, თითქოს რაიმეს ვმალავ. არაფერს ვმალავ. არც არასდროს დამიმალავს“, – აცხადებს მინისტრი.
ჯუანშერ ბურჭულაძის თქმით, ის მედიასაშუალებები, რომლებიც მის მიმართ შავ პიარს აგორებენ, სწორედ კორუფციული სქემებით მოპოვებული თანხით ფინანსდებიან.
„აქ ერთი ნიშანდობლივი რაც არის, სწორედ ეს ხალხი, ეს ტელევიზიები ფინანსდებიან იმ კორუფციული და ჩვენი ხალხისგან მოპარული ფულით. მათ აქვთ მილიონობით ხელფასი აღებული. ეს სწორედ ის თანხებია, რაც მიითვისეს კორუფციული სქემებით სახელმწიფოებისგან. ამას მტკიცებულებები არ სჭირდება, სასამართლოები გვაქვს მოგებული. მარტო ჩემი ორი წინამორბედი წინა ხელისუფლებიდან, არიან ოლიგარქები, მულტიმილიონერები. კეზერაშვილი და ოქრუაშვილი და ერთ-ერთის შემთხვევაში დამტკიცებულია ეს სასამართლოთი, რომ მას აქვს წარმოუდგენელი სქემებით მითვისებული თანხები სახელმწიფო ბუჯეტებით. ამით ფინანსდებიან ზუსტად, იღებენ მილიონობით ლარს ხელფასს და უნდათ ჩვენ ჯარისკაცებს და თუნდაც საჯარო მოხელეებს, რომლებიც დღე და ღამე ვზრუნავთ, რომ როგორღაც გავუუმჯობესოთ პირობები ჩვენს ჯარისკაცებს…“, – აცხადებს მინისტრი.
წამყვანის კითხვაზე, რომ მსგავს სატელევიზიო სიუჟეტებში ფიგურირებდა ძვირდაღირებული საჩუქრები და რამდენად არსებობს მსგავსი პრაქტიკა სხვა ქვეყნებში, მინისტრი ამბობს, რომ მსგავსი პრაქტიკა მთელ მსოფლიოშია და ამაში განსაკუთრებული არაფერია.
„ჩვენს უწყებასაც ჰქონდა ეს პრაქტიკა და წინა ხანძრების დროსაც სამხედრო მოსამსახურეები დააჯილდოვეს ნაწილი ფულადი ჯილდოთი და ნაწილი – მობილური ტელეფონებით. ეს პრაქტიკა გავაგრძელეთ. სამი წლის განმავლობაში ჩვენს სისტემაში არ გაცემულა არცერთ სამოქალქო პირზე მობილური ტელეფონები. წარმომადგელობით ხაჯებს რაც შეეხება, აქ კანონიც კი ითვალისწინებს, რომ საახალწლოდ საჩუქარს ვიყიდით თუ ნობათს, ეს არის წარმომადგენლობითი ხარჯი. ეს მთელ მსოფლიოში ასეა. წყალი არ გაუვა. პარტნიორებიც გაკვირვებულები არიან და ამბობენ, რომ ეს აბსურდი საიდან მოდის. ეს კიდევ ერთხელ ჩვენი ქვეყნის დისკრედიტაციაზე მუშაობს, არა მარტო ჯარის“, – აცხადებს ბურჭულაძე.