სასამართლო სტატისტიკისა და საერთაშორისო კვლევების ფონზე სასამართლოზე ბრალდებები არაადეკვატური და აბსურდულია, – ამის შესახებ მოძრაობა „ხალხის ძალის“ წევრმა, გურამ მაჭარაშვილმა განაცხადა.
მისივე თქმით, არსებობს თავად ამერიკული ინსტიტუტების კვლევები, რომლის მიხედვითაც 2012 წლიდან დღემდე ქართული მართლმსაჯულება აბსოლუტურად შეცვლილია პოზიტივისკენ.
„სასამართლო სტატისტიკის ფონზე და საერთაშორისო კვლევებიდან გამომდინარე ბრალდებები სასამართლოზე არა თუ ადეკვატური არ არის, არამედ აბსურდულია. Ipsos-ის კვლევა არსებობს, ასევე, ამერიკის ინსტიტუტების კვლევებიც არსებობს, რომ 2012 წლიდან დღემდე აბსოლუტურად შეცვლილია პოზიტივისკენ ქართული მართლმსაჯულება. ასევე, არსებობს საერთაშორისო ინსტიტუტების დასკვნები, რომ ადვოკატის ინსტიტუტი გაძლიერდა როგორც საკანონმდებლო დონეზე, ასევე, პრაქტიკის დონეზეც. რა თქმა უნდა, ამ შემთხვევაში როდესაც შენ საუბრობ, რომ მოსამართლე უნდა დასანქცირდეს, ეს მიუღებელია“,- განაცხადა მაჭარაშვილმა.
რადიკალურ ოპოზიციას სასამართლოში არსებულ ვითარებაზე ოფიციალური სტატისტიკით პასუხობს მმართველი გუნდი. 2012 წლის შემდეგ 3-ჯერ ნაკლებია წინასწარი და ადმინისტრაციული პატიმრობა. 5-ჯერ ნაკლებია ჯარიმები, 18-ჯერ შემცირებულია გირაო, ორჯერ ნაკლებია საგამოძიებო მოქმედებებზე შუამდგომლობათა დაკმაყოფილება და 3-ჯერ არის შემცირებული სტრასბურგში გაგზავნილი სარჩელები.