ყველამ იცის, რომ სასამართლო სისტემაში არის ფუნდამენტურად გაჯანსაღებული ვითარება და ეს არ არის მხოლოდ მნიშვნელოვანი ცვლილებები, რაც ჩვენ მივიღეთ 2012 წლის შემდეგ. სასამართლო სისტემაში ფუნდამენტურად, რადიკალურად, დრამატულად არის შეცვლილი ვითარება 2012 წლის შემდეგ და არა მარტო შეცვლილია შეიძლება თამამად ითქვას, რომ ყველა სისტემური პრობლემა სასამართლო ხელისუფლებაში არის აღმოფხვრილი, – ამის შესახებ „ქართული ოცნების“ თავმჯდომარემ ირაკლი კობახიძემ ისაუბრა.
„სწორედ ამის მტკიცებულებაა ის სტატისტიკა, რომელზეც აქ გვქონდა საუბარი. თქვენ ნახეთ, რომ გუშინ ვერცერთი რეპლიკაც კი ვერ დაუპირისპირეს ამ სტატისტიკას. იმდენად შთამბეჭდავია ცვლილებები, რასაც მოწმობს ეს სტატისტიკური მაჩვენებლები, რომ ვერაფერს ვერ ამბობენ ამაზე. ეს სტატისტიკა აჩვენებს იმას, რომ სასამართლოში ყველა სისტემური პრობლემა არის აღმოფხვრილი. ეს არის უტყუარი მტკიცებულება, შესაბამისად ამას ვერაფერს ვერ უპირისპირებენ, ვერც ოპოზიცია და ვერც ის ადამიანები, რომლებიც სახელმწიფო დეპარტამენტისთვის ამზადებენ განცხადების ტექსტებს, ვერ NGE-ები, უცხოელი აგენტები და ა.შ. ვერავინ ვერ უარყოფს იმას, რომ სასამართლოში არის ფუნდამენტურად, რადიკალურად, დრამატულად შეცვლილი ვითარება. შესაბამისად, მთელი ეს კამპანია სასამართლო ხელისუფლების წინააღმდეგ ისახავს ერთადერთ მიზანს, ეს არის სამართლის დამოუკიდებლობის ხელყოფა, რა თქმა უნდა, ამის საშუალებას ვერავის მივცემთ“, – განაცხადა კობახიძემ.