ანტიდასავლური განცხადებები გააკეთაო [პრემიერმა] – თუკი ჩვენს ეროვნულს, ტრადიციულს, ასეთ ღირებულებებს ვარქმევთ [ანტიდასავლურს], ამით რას ვეუბნებით ჩვენს საზოგადოებას, რომლის 90%-ზე მეტს ამ მიმართულებით სწორი წარმოდგენა აქვს, რომ თურმე თქვენ რაც არ მოგწონთ, ის არის დასავლური, – ამის შესახებ ფრაქცია „ქართული ოცნების“ თავმჯდომარემ მამუკა მდინარაძემ ჟურნალისტებთან განაცხადა, რითაც გამოეხმაურა პრემიერის უნგრეთში ვიზიტთან დაკავშირებით ოპონენტების კომენტარებს.
„როდესაც უფლებების დაცვაზეა საუბარი, ანტიდისკრიმინაციულ მიდგომებზეა ლაპარაკი, აქ უნდა იყოს ყველა ცივილიზებული ქვეყანა შეუვალი. მაგრამ, როდესაც პროპაგანდაზეა საუბარი, რომელიც თავისი შინაარსით არის არაჯანსაღი, აქ აბსოლუტურად სხვა რამესთან გვაქვს საქმე. არაჯანსაღი პროპაგანდაა მათ შორის ისიც, რომ საქართველოს პრემიერ-მინისტრის გამოსვლას აქტუალურ და მთავარ თემებზე დაუმალავ საზოგადოებას და ცდილობ, რომ LGBT პროპაგანდის ავანგარდად წარმოადგინო ევროპა. „ნაცმოძრაობის“ ტელევიზიების და მათი პოლიტიკოსების გადასახედიდან ასე დომინირებდა ინფორმაცია – ყველაფერ ეროვნულს უწოდებდნენ რუსულს და არაჯანსაღ პროპაგანდას უწოდებდენ დასავლურს და ამით აფუჭებენ ევროპულ საქმეს. ეს არის არაჯანსაღი პროპაგანდა. ანტიდასავლური განცხადებები გააკეთაო – თუკი ჩვენს ეროვნულს, ტრადიციულს, ასეთ ღირებულებებს ვარქმევთ [ანტიდასავლურს], ამით რას ვეუბნებით ჩვენს საზოგადოებას, რომლის 90%-ზე მეტს ამ მიმართულებით სწორი წარმოდგენა აქვს, რომ თურმე თქვენ რაც არ მოგწონთ, ის არის დასავლური“, – განაცხადა მდინარაძემ.