ბათუმი უძრავი ქონების სფეროში წლის ერთ-ერთ მთავარ ღონისძიებას FIABCI უძრავი ქონების და ტურიზმის ფორუმი Batumi Real Estate 2023 უმასპინძლებს. FIABCI-Georgia და Property Georgia-ს მიერ ორგანიზებული ფორუმი, აჭარის ავტონომიური რესპუბლიკის მთავრობის პატრონაჟით ჩატარდება.
აჭარის ფინანსთა და ეკონომიკის სამინისტროს პრესსამსახურის ცნობით, ფორუმში მონაწილეობას FIABCI-ის მსოფლიო Prix d’Excellence დაჯილდოების გამარჯვებულები და უძრავი ქონების საერთაშორისო ოსკარების მფლობელი კომპანიები მიიღებენ.
„უძრავი ქონების სფეროში წლის მასშტაბურ ღონისძიებას ცნობილი სამშენებლო-დეველოპერული კომპანიები, არქიტექტორები, ურბანისტები, ინვესტორები და ექსპერტები დაესწრებიან. ფორუმზე აჭარის რეგიონის საინვესტიციო და ტურისტულ პოტენციალზე ექსპერტები ისაუბრებენ. ღონისძიების ფარგლებში B2B შეხვედრები გაიმართება. ფორუმი 12 ივლისს, 11:00 საათზე, ქ.ბათუმში, სასტუმროში Courtyard by Marriott Batumi გაიხსნება.
ფლორიდაში, ქ.მაიამიში 5-9 ივნისს გამართულ FIABCI-ის (უძრავი ქონების საერთაშორისო ფედერაცია) 73-ე მსოფლიო კონგრესს, საქართველოდან დელეგაცია აჭარის ავტონომიური რესპუბლიკის მთავრობის, FIABCI-Georgia-ს მენეჯმენტის და წევრების შემადგენლობით ესწრებოდა. აღნიშნული ღონისძიების ფარგლებში, 8 ივნისს, მსოფლიო ოსკარებად წოდებული უძრავი ქონების დაჯილდოება გაიმართა. FIABCI World Prix d’Excellence Awards-ზე ქართული პროექტები წელს პირველად იყო წარდგენილი. აღნიშნულმა პროექტებმა საქართველოს სახელით პირველად გაიმარჯვა და უძრავი ქონების სექტროში უმაღლესი ჯილდო-FIABCI World Prix d’Excellence აღიარება მოიპოვა. ესენი არიან: „აჭარაბეთ არენა“ (ბათუმის სტადიონი)- წარმდგენები: კომპანია „ანაგი“ და კომპანია „სიემსი“, მწვანე ქალაქი ლისზე“-წარმდგენი: კომპანია „ლისი დეველოპმენტი“ და „მეამა“- წარმდგენი: არქიტექტორი, გიორგი ხმალაძე.
აღსანიშნავია, რომ ქ.მაიამიში FIABCI-ის უძრავი ქონების პროექტების Prix d’Excellence დაჯილდოებაზე წელს გამარჯვებულმა პროექტებმა, პირველ ეტაპზე, 2022 წლის 28 ოქტომბერს, FIABCI-Georgia-ს და Property Georgia-ს ორგანიზებით და ,,საქართველოს ბანკის მხარდაჭერით“, გამართულ FIABCI-Georgia Prix d’Excellence Awards-ზე მოიპოვეს გამარჯვება. შემდეგი, რიგით მეორე ეროვნული დაჯილდოება 2024 წელს გაიმართება. გამარჯვებულებს ქართველი და საერთაშორისო უძრავი ქონების პროფესიონალებისგან შემდგარი ჟიური შეარჩევს“, – აღნიშნულია სამინისტროს მიერ გავრცელებულ ინფორმაციაში.