ამ ადამიანის ქცევაში, განცხადებებში ქართული მხოლოდ გვარია, დანარჩენი ყველაფერი – ანტიქართული, – ამის შესახებ ფრაქცია „ქართული ოცნების“ თავმჯდომარის მოადგილემ, ირაკლი ჩიქოვანმა გადაცემაში „იმედი LIVE“ დავით არახამიაზე საუბრისას განაცხადა.
„ეს ადამიანი (დავით არახამია) ამბობს, რომ საქართველოს წინააღმდეგ უნდა მიიღონ გარკვეული გადაწყვეტილებები და ერთ ადამიანს (ვინც არ უნდა იყოს) აბამს ჩვენი ქვეყნის პერსპექტივასა და მომავალს. მას გაცილებით მნიშვნელოვანი საკითხები აქვს, რითაც უნდა დაკავდეს – ეს არის საკუთარი ქვეყნის უსაფრთხოება და ის პოლიტიკური პროცესები, რომელიც იმ ქვეყანაში მიმდინარეობს. მის განცხადებებში არაფერი ქართული არაა. როდესაც არახამია და მისნაირები საუბრობენ, ალბათ ადეიშვილის ნაკარნახევით საუბრობენ. თუ რამე გამოძიებაა დასაწყები, პირველ რიგში იმაზეა დასაწყები, როგორ გადმოკვეთა სააკაშვილმა უკრაინის საზღვარი“, – აღნიშნა ირაკლი ჩიქოვანმა.