საფრანგეთის პრეზიდენტის, ემანუელ მაკრონის მთავარმა დიპლომატიურმა მრჩეველმა, ემანუელ ბონმა განაცხადა, რომ ჩინეთი რუსეთს აწვდის ნივთებს, რომელიც სამხედრო აღჭურვილობად შეიძლება გამოიყენებოდეს, თუმცა არა დიდი მასშტაბით. ინფორმაციას ამის შესახებ ბრიტანული გამოცემა The Guardian-ი ავრცელებს.
„დიახ, არის მინიშნებები, რომ ისინი [ჩინეთი] აკეთებენ იმას, რაც ჩვენ გვირჩევნია, რომ არ გააკეთონ. რამდენადაც ჩვენ ვიცით, ისინი არ აწვდიან [რუსეთს] დიდი მასშტაბით სამხედრო შესაძლებლობებს, მაგრამ [ჩვენ გვჭირდება, რომ არ იყოს] მიწოდება. ჩვენ ყველაზე მეტად გვჭირდება ჩინეთის მხრიდან თავშეკავება. ჩვენ გვჭირდება, რომ მათ გაიგონ, რომ უკრაინაში გლობალური მასშტაბის კონფლიქტს აქვს ადგილი და რომ ჩვენ ვერ დავუშვებთ უკრაინის დამარცხებას პრინციპული, მაგრამ ასევე ძალიან ოპერატიული მიზეზების გამო“, – აღნიშნა ემანუელ მაკრონის დიპლომატიური გუნდის ხელმძღვანელმა.
ფრანგმა ოფიციალურმა პირებმა CNN-ს განუმარტეს, რომ ემანუელ ბონი გულისხმობდა ორმაგი დანიშნულების ტექნოლოგიებსა და არალეტალურ დახმარებას, როგორიცაა ჩაფხუტი და ჯავშანი.
