ამერიკის შეერთებული შტატების ცენტრალური დაზვერვის სააგენტოს (CIA) დირექტორის, უილიამ ბერნსის განცხადებით, გასაკვირი იქნება, თუ რუსეთის პრეზიდენტი ვლადიმირ პუტინი შეიარაღებული ფორმირება „ვაგნერის“ ხელმძღვანელ ევგენი პრიგოჟინზე შურს არ იძიებს.
როგორც ბერნსმა ასპენის ინსტიტუტის ფორუმზე განაცხადა, პუტინი შეეცდება, მაქსიმალურად დაარეგულიროს „ვაგნერის“ შეიარაღებული ამბოხის შედეგები, რათა შემდეგ პრიგოჟინზე შური იძიოს.
„ვფიქრობ, პუტინი იმ ადამიანთა რიცხვს განეკუთვნება, რომლებიც თვლიან, რომ შურისძიება ცივად მისართმევი კერძია. ის შეეცდება სიტუაცია მაქსიმალურად დაარეგულიროს. გამიკვირდება, თუ პუტინი პრიგოჟინს სამაგიეროს არ გადაუხდის“, – აცხადებს ბერნსი.
მისივე თქმით, პრიგოჟინის ნეიტრალიზებამდე პუტინი შეეცდება, ის „ვაგნერისგან“ განაცალკევოს, ვინაიდან ის კრემლს უკრაინაში, აფრიკისა და ახლო აღმოსავლეთის ქვეყნებში სჭირდება.
CIA-ის დირექტორმა ასევე განაცხადა, რომ აშშ-ის ადმინისტრაციამ იცოდა პრიგოჟინის გეგმების შესახებ. მისი განცხადებით, პრიგოჟინის მხრიდან რუსეთის თავდაცვის მინისტრისა და გენშტაბის მეთაურის მისამართით კრიტიკის ფონზე მოვლენების ასეთი განვითარება დიდწილას მოსალოდნელი იყო.