2025 წელს საფრანგეთის დედაქალაქში, მდინარე სენაზე 3 საბანაო ზონა გაიხსნება. ამის შესახებ BBC წერს.
გამოცემის ინფორმაციით, საბანაო ზონები ქალაქის სხვადასხვა ნაწილში გაიხსნება და მათზე პატრულირებას მაშველები განახორციელებენ. როგორც პარიზის მერმა, ან იდალგომ განაცხადა, მას სურს, რომ ეს ინიციატივა 2024 წლის პარიზის ოლიმპიური თამაშების მთავარ მემკვიდრეობად დარჩეს ქალაქში. სწორედ სენაზე გაიმართება თამაშების გახსნის ცერემონია და ჩატარდება შეჯიბრი სპორტის სამ სახეობაში.
სენაში ბანაობა 1923 წლიდან არის აკრძალული. ამის მიზეზი კი გემების მიმოსვლა გადაადგილება და წყლის ხარისხის გაუარესება გახდა. პრობლემას ასევე წარმოადგენდა მე-19 საუკუნეში შექმნილი სადრენაჟო ინფრასტრუქტურა, რომელიც სამზარეულოებიდან და სველი წერტილებიდან ნახმარ წყალს ჩამდინარე წყლებთან აერთიანებს.
ჩვეულებრივ, ეს ჩამდინარე წყლები ქუჩების ქვეშ არსებული გვირაბების კომპლექსის მეშვეობით გარეუბანში არსებულ გამწმენდ ნაგებობაში მიედინება. თუმცა, ძლიერი წვიმის დროს, სისტემა წყლის რაოდენობას ვერ უმკლავდება და წყლის ნაწილი სენაში ხვდება. ქალაქის მთავრობამ პრობლემა უზარმაზარი მიწისქვეშა რეზერვუარის მშენებლობით მოაგვარა, რომელშიც წყალი ძლიერი წვიმის დროს შეინახება.
სისტემა საბოლოოდ ოლიმპიური თამაშების დასაწყისისთვის ამოქმედდება, თუმცა ქალაქის მთავრობის ძალისხმევას უკვე აქვს შედეგი: შარშან ჩატარებულმა ტესტებმა აჩვენა, რომ წყალში ბაქტერიების დონზე ბანაობისთვის უსაფრთხოა 90%-ზე მეტ შემთხვევაში. ამასთან, თუ 1960-იან წლებში სენაში თევზის მხოლოდ 3 სახეობა ბინადრობდა, დღეს ეს მაჩვენებელი 35-მდე არის გაზრდილი.