სპეციალური პენიტენციური სამსახურის მხარდაჭერითა და საქართველოს საპატრიარქოს ორგანიზებით, №11 (არასრულწლოვანთა) დაწესებულებაში ნოდარ დუმბაძის სახელობის მოზარდ მაყურებელთა თეატრის სპექტაკლი გაიმართა, – ამის შესახებ ინფორმაციას სპეციალური პენიტენციური სამსახური ავრცელებს.
მათივე ინფორმაციით, თეატრალური წარმოდგენა სრულიად საქართველოს კათოლიკოს-პატრიარქის, უწმინდესისა და უნეტარესის ილია მეორის აღსაყდრებიდან 45 წლის საიუბილეო თარიღთან დაკავშირებით მიძღვნილი ღონისძიებების ფარგლებში ჩატარდა.
სპექტაკლში მსახიობებმა საქართველოს ისტორიის რამდენიმე მნიშვნელოვანი ეპიზოდი გააცოცხლეს. ჯაზ-კვარტეტის მონაწილეობით შესრულდა მუსიკალური ნომრებიც.
ღონისძიებას დაწესებულების თანამშრომლები და საქართველოს საპატრიარქოდან დეკანოზი ალექსანდრე გალდავა დაესწრნენ.
სპეციალური პენიტენციური სამსახური მომავალშიც გააგრძელებს არასრულწლოვანი მსჯავრდებულების საზოგადოებაში რეინტეგრაციის პროცესის მხარდაჭერას და მათ სხვადასხვა აქტივობაში ჩართულობის ხელშეწყობას.