ბათუმში ახალგაზრდა მამაკაცი შტორმის დროს ზღვაში შევიდა. მაშველებს სამაშველო ოპერაცია დიდი ტალღების გამო გაუჭირდათ, თუმცა მისი ზღვიდან ამოყვანა მაინც შეძლეს. როგორც “კვირას” შემთხვევის ადგილიდან ატყობინებენ, ამ ეტაპზე უცნობია მამაკაცის ჯანმრთელობის მდგომარეობა.
როგორც თვითმხილველი აცხადებს, მამაკაცის გამოსაყვანად თავდაპირველად ორმა მაშველმა შეცურა, თუმცა შტორმმა მათ მამაკაცთან მიახლოების უფლება არ მისცა, შემდეგ კი სამაშველო ოპერაციაში კატარღა ჩაერთო.
“ძლიერი ტალღების გამო კატარღას ნაპირის სიახლოვეს უჭირდა გაჩერება და მამაკაცთან მიახლოება, ამიტომ მაშველებმა ის სიღრმეში შეიყვანეს და ამ მეთოდით შეძლეს მამაკაცის გადარჩენა”, – ჰყვება “კვირასთან” თვითმხილველი.
ადგილზე სასწრაფო და საპატრულო ეკიპაჟია მობილიზებული. მამაკაცის ჯანმრთელობის მდგომარეობასთან დაკავშირებულ ვითარებას “კვირა” შესაბამის უწყებაში არკვევს.
აღსანიშნავია, რომ ამინდი აჭარაში გუშინ მკვეთრად გაუარესდა.
