ჩინეთთან დაფიქრებული, სტრატეგიული, წინდახედული ურთიერთობებით შეგვიძლია, ურთიერთობები დავაბალანსოთ როგორც რუსეთთან, ასევე აშშ-თან და ჩვენი პოლიტიკური ამბიციები გავზარდოთ, – ამის შესახებ „ქრონიკას“ საზოგადოებრივი ორგანიზაცია „პოლიტიკური არჩევანის“ დამფუძნებელმა, რომან კაკულიამ განუცხადა, რომელმაც საქართველოს პრემიერ-მინისტრის ირაკლი ღარიბაშვილის ჩინეთში ვიზიტის მნიშვნელობაზე ისაუბრა.
„დღევანდელ მსოფლიოს თუ რაიმე გადაარჩენს კატასტროფისგან, ეს არის პოლიტიკაში ე.წ რეალიზმის დაბრუნება, რომლის მთავარი ინსტრუმენტი ძალთა ბალანსი გახლავთ.
ჩვენ, საქართველოს მოგვეცა უნიკალური შესაძლებლობა, ჩვენს ტერიტორიაზე მიკრომოდელი შევქმნათ ძალთა ბალანსის ამ მნიშვნელოვანი მოცემულობის. ჩინეთთან შეგვიძლია დაფიქრებული, სტრატეგიული, წინდახედული ურთიერთობებით დავაბალანსოთ ურთიერთობები როგორც რუსეთთან, ასევე აშშ-თან და გავზარდოთ ჩვენი პოლიტიკური ამბიციები როგორც ერთი, ასევე მეორე ქვეყნის მიმართ, რადგან რუსეთის დასაბალანსებლად მხოლოდ დასავლეთი რამდენად გამოგვადგა, ჩვენ, ყველამ ეს ვნახეთ. ამდენად, ვალდებული ვართ, ეს ახალი შესაძლებლობა ძალიან კარგად გამოვიყენოთ და ახლა ბურთი უკვე ნამდვილად ჩვენი მთავრობის საგარეო გუნდის მხარესაა“, – განაცხადა კაკულიამ.
საქართველოს პრემიერ-მინისტრის, ირაკლი ღარიბაშვილის ვიზიტი ჩინეთის სახალხო რესპუბლიკაში 27 ივლისს დაიწყო. ირაკლი ღარიბაშვილი 28 ივლისს ჩინეთის სახალხო რესპუბლიკის პრეზიდენტს სი ძინპინს შეხვდა. საქართველო პრემიერ-მინისტრმა ირაკლი ღარიბაშვილმა და ჩინეთის სახალხო რესპუბლიკის პრეზიდენტმა სი ძინპინმა საქართველო-ჩინეთის ურთიერთობების სტრატეგიული პარტნიორობის დონემდე ამაღლების შესახებ განაცხადეს.