ორ ქვეყანას შორის უკვე არსებული კარგი ორმხრივი ურთიერთობები გადადის ახალ ფაზაში. ეს იქნება სტრატეგიული თანამშრომლობა საქართველოსა და ჩინეთს შორის, რომელიც განსაზღვრავს სხვადასხვა განზომილებებს. ეს არის პოლიტიკური, ეკონომიკური, ხალხთაშორისი ურთიერთობები და საერთაშორისო ფორმატებში ორ ქვეყანას შორის თანამშრომლობის მიმართულებით, – ამის შესახებ საგარეო საქმეთა მინისტრმა ილია დარჩიაშვილმა განაცხადა.
„პოლიტიკური მიმართულებით ეს არის, როგორც ვთქვი, ახალი ფაზა, სტრატეგიული თანამშრომლობის, რომელიც მოიტანს ორ ქვეყანას შორის თანამშრომლობის ახალ იმპულსს. რაც შეეხება ეკონომიკურ მიმართულებას, ჩვენ გვაქვს ძალიან დინამიკური სავაჭრო-ეკონომიკური ურთიერთობები ჩინეთთან და ეს პოლიტიკური კიდევ უფრო გაღრმავებული ურთიერთობები ახალ იმპულსს მისცემს სავაჭრო და ეკონომიკურ თანამშრომლობას“, – აღნიშნა ილია დარჩიაშვილმა.
საქართველოს პრემიერ-მინისტრის, ირაკლი ღარიბაშვილის ვიზიტი ჩინეთის სახალხო რესპუბლიკაში 27 ივლისს დაიწყო. ირაკლი ღარიბაშვილი 28 ივლისს ჩინეთის სახალხო რესპუბლიკის პრეზიდენტს სი ძინპინს შეხვდა. საქართველო პრემიერ-მინისტრმა ირაკლი ღარიბაშვილმა და ჩინეთის სახალხო რესპუბლიკის პრეზიდენტმა სი ძინპინმა საქართველო-ჩინეთის ურთიერთობების სტრატეგიული პარტნიორობის დონემდე ამაღლების შესახებ განაცხადეს.
საქართველოს მთავრობის ადმინისტრაციამ, სტრატეგიული პარტნიორობის დამყარების შესახებ, ჩინეთის სახალხო რესპუბლიკისა და საქართველოს ერთობლივი განცხადება კი დღეს გაავრცელა.