პოლონეთის პრემიერ-მინისტრმა, მატეუშ მორავეცკიმ მკაცრად დაგმო ოფიციალური კიევის გადაწყვეტილება საგარეო საქმეთა სამინისტროში პოლონეთის ელჩის გამოძახების შესახებ.
მანამდე უკრაინის საგარეო საქმეთა სამინისტროში პოლონეთის ელჩი დაიბარეს მას შემდეგ, რაც პოლონეთის პრეზიდენტის ადმინისტრაციის მაღალჩინოსანმა განაცხადა, რომ უკრაინამ უნდა დაიწყოს იმის დაფასება, რასაც პოლონეთი მისთვის აკეთებს.
“პოლონეთის ელჩის – იმ ქვეყნის წარმომადგენლის, რომელიც ერთადერთი იყო, ვინც კიევში დარჩა უკრაინაში რუსეთის შეჭრის დღეს – უკრაინის საგარეო საქმეთა სამინისტროში დაბარება არასდროს უნდა მომხდარიყო.
საერთაშორისო პოლიტიკაში, მიმდინარე ომის პირობებში და იმ უზარმაზარი მხარდაჭერის გათვალისწინებით, რომელიც პოლონეთმა გაუწია უკრაინას, ასეთი შეცდომები არ უნდა მოხდეს.
ჩვენ მუდამ დავიცავთ პოლონეთის კეთილ სახელს, მის უსაფრთხოებასა და არცერთი სხვა ქვეყნის ინტერესი არასდროს დადგება პოლონეთის ინტერესებზე მაღლა”, – აღნიშნა მატეუშ მორავეცკიმ.
31 ივლისს, პოლონეთის პრეზიდენტის ადმინისტრაციაში სახელმწიფო მდივანმა და საერთაშორისო პოლიტიკის სამსახურის ხელმძღვანელმა, მარჩინ პშიდაჩმა განაცხადა, რომ უკრაინამ მართლაც დიდი მხარდაჭერა მიიღო პოლონეთისგან და უკრაინამ იმ როლის დაფასება უნდა დაიწყოს, რომელიც პოლონეთმა უკრაინისთვის ბოლო თვეებსა და წლებში შეასრულა.