სტიქიის ზონაში რთული ვითარებაა, მაშველები არ ჩერდებიან, ყველანაირ ძალისხმევას წევენ, ყველა კუთხე-კუნჭულს ათვალიერებენ, ერთი მილიმეტრი არ რჩებათ, რომ არ შეამოწმონ, – ამის შესახებ საქართველოს პირველ არხს სტიქიის ზონაში მყოფმა მოხალისემ, ირაკლი საბანაძემ განუცხადა.
მისი თქმით, მოხალისეები ჩამოსული არიან სტიქიის ზონაში, რომ თავიანთი წვლილი შეიტანონ ადამიანების გადარჩენაში.
„რთული ვითარებაა, ყოფილი მაშველი ვარ, ალპინისტებისა და ექსტრემალების ჯგუფი ჩამოვედით, როგორც მოხალისეები და ყველაფერს ვაკეთებთ, რათა შედეგი დავდოთ და წვლილი შევიტანოთ. ძალიან რთული პირობებია, ცუდი ტალახია და თითქმის შეუძლებელია მოძრაობა. საშინელი ვითარებაა. მაშველები არ ჩერდებიან, ყველანაირ ძალისხმევას აკეთებენ, ყველგან გაშლილები არიან, ყველა კუთხე-კუნჭულს ათვალიერებენ, ერთი მილიმეტრი არ რჩებათ, რომ არ შეამოწმონ“, – განაცხადა ირაკლი საბანაძემ.