200-მდე სხვადასხვა სახის მოწყობილობა მონტაჟდება იმ ადგილებში, სადაც საჭიროა, – ამის შესახებ პარლამენტის თავმჯდომარემ, შალვა პაპუაშვილმა ჟურნალისტებს განუცხადა, რომელსაც კითხვა დაუსვეს ადრეული გაფრთხილების სისტემებთან დაკავშირებით, „დარიალის ხეობის მსგავსად, რატომ ვერ მოხერხდა აღნიშნული მოწყობილობის შოვში დამონტაჟება?“
პაპუაშვილის თქმით, მოწყობილობების მონტაჟი მიმდინარეობს, რასაც გარკვეული დრო სჭირდება.
„რამდენადაც ვიცი, დარიალში ჯერ არ ყოფილა შემთხვევა, რომ მისი ამუშავება ყოფილიყო საჭირო. სწორედ მას შემდეგ, რაც დევდორაკის მყინვარზე იყო ბუნებრივი კატასტროფა, გადაწყვეტილება იქნა მიღებული, რომ ამ სისტემით დაიფაროს მთლიანად საქართველო. 200-მდე სხვადასხვა ასეთი სახის მოწყობილობა იქნა შეძენილი და ის მონტაჟდება საჭიროების განსაზღვრის მიხედვით იმ ადგილებში, სადაც საჭიროა. დღეს ეს დამონტაჟებულია დარიალის ხეობაში, თბილისში – ვერეს ხეობაში და მიდის ეტაპობრივად. შეიძლება, სამი წელი არ ეყოს მთლიანად დაფარვას, მაგრამ საქმე ისაა, რომ სწორედ ეს არის ნაწილი პოლიტიკისა, რომელიც აქვს ჩვენს მთავრობას.
200 ასეთი მოწყობილობა უკვე შეძენილია და მიდის მისი დამონტაჟება, რასაც გარკვეული დრო სჭირდება. გარდა ამისა, იცით, რომ სარადარო სისტემა, რომელიც მთლიანად მოშლილი იყო, ესეც აღდგენილია. ორი რადარია დაყენებული, რომელიც ფარავს საქართველოს და იძლევა ასევე ინფორმაციას ამინდთან და სხვადასხვა ბუნებრივ მოვლენებთან დაკავშირებით. გასაგებია, რომ იყო სურვილი, ეს ყოფილიყო 2-3 წელიწადში, მაგრამ დრო სჭირდება, ვინაიდან ეს არის ტექნიკურად რთული საკითხი. ეს შეეხება მიუვალ ადგილებს და ამას გარდა, მნიშვნელოვანია არა სპონტანურად მონტაჟი სხვადასხვა ადგილას, არამედ საჭიროების მიხედვით და საჭიროა პრიორიტეტების განსაზღვრა“, – განაცხადა შალვა პაპუაშვილმა.