აშშ-ის სადაზვერვო საზოგადოება ვარაუდობს, რომ უკრაინელი სამხედროები კონტრიერიშის ფარგლებში საკვანძო მნიშვნელობის მქონე ქალაქ მელიტოპოლს ვერ მიაღწევენ. ასეთ შემთხვევაში კიევი მიმდინარე წელს ვერ შეასრულებს მთავარ ამოცანას – რუსეთიდან ყირიმისკენ სახმელეთო დერეფნის ბლოკირებას. ამის შესახებ გასაიდუმლოებულ პროგნოზზე წვდომის მქონე წყაროებზე დაყრდნობით გამოცემა The Washington Post-ი წერს.
პროგნოზის თანახმად, დანაღმული ველების საშუალებით რუსეთი ოკუპირებული ტერიტორიის დაცვას შეძლებს, რაც, სავარაუდოდ, დასახელებული იქნება უკრაინისა და მისი მოკავშირეების მხრიდან როგორც მთავარი მიზეზი იმისა, რატომაც კონტრიერიშმა დასახული ამოცანა ვერ შეასრულა.
ამერიკული ოფიციალური პირების თქმით, უკრაინული ძალები, რომლებიც მელიტოპოლისკენ 80 კილომეტრით მოშორებით მყოფი ქალაქ რობოტინოდან მიემართებიან, მელიტოპოლიდან რამდენიმე კილომეტრში გაჩერდებიან.
პროგნოზში ასევე აღნიშნულია, რომ მელიტოპოლს უკრაინის კონტრიერიშისთვის გადამწყვეტი მნიშვნელობა აქვს, ვინაიდან ის ყირიმის კარიბჭედ მიიჩნევა. ყირიმიდან უკრაინის სხვა ოკუპირებულ ტერიტორიებზე რუსული არმიის ცოცხალი ძალა და სამხედრო ტექნიკა სწორედ მელიტოპოლის გავლით ხვდება.