უკრაინის კორუფციის პრევენციის ეროვნულმა სააგენტომ თამბაქოს კომპანიები Japan Tobacco International-ი და Philip Morris International-ი ომის საერთაშორისო სპონსორების სიაში შეიყვანა. ინფორმაციას ამის შესახებ უკრაინული მედია ავრცელებს.
როგორც უწყების ვებგვერდზეა აღნიშნული, კომპანიები აგრძელებენ ბიზნესის კეთებას რუსეთში და მხარს უჭერენ აგრესორი ქვეყნის ეკონომიკას ბიუჯეტში მნიშვნელოვანი გადასახადების გადახდით.
განცხადებაში აღნიშნულია, რომ კომპანია Japan Tobacco International-ი (JTI) რუსეთში თამბაქოს ბაზრის უდავო ლიდერია, ბაზრის წილით, რომელიც თითქმის 35%-ს შეადგენს. კომპანია რუსეთის ბაზარზე წარმოდგენილია ისეთი ბრენდებით, როგორიცაა Winston, LD, Mevius, Camel, Sobranie.
„ბოლო 20 წლის განმავლობაში JTI-ს ინვესტიციებმა რუსეთის ეკონომიკაში 4.6 მილიარდ დოლარს გადააჭარბა. 2020 წელს კომპანიის საგადასახადო გადასახადებმა რუსეთის ფედერალური ბიუჯეტის შემოსავლის 1.4% შეადგინა“, – ნათქვამია განცხადებაში.
უწყებაში აღნიშნავენ, რომ რომ მიუხედავად იმისა, რომ JTI-ის წარმომადგენლებმა განაცხადეს, რომ JT Group-მა შეაჩერა ახალი ინვესტიციები და მარკეტინგული საქმიანობა რუსეთში, კომპანია კვლავ აგრძელებს პროდუქციის წარმოებასა და დისტრიბუციას რუსეთის ფედერაციაში.
ამავდროულად, სიგარეტისა და თამბაქოს კომპანია Philip Morris International-ი 2019 წელს რუსეთის ბაზრის 30.1%-ს იკავებდა. Philip Morris International-ის მთლიანი ინვესტიცია რუსეთში ახლა 2 მილიარდ დოლარს აჭარბებს.
კომპანიის რუსული ფილიალის ფინანსური ანგარიშგების მიხედვით, კომპანიის შემოსავალი უკრაინაში რუსეთის სრულმასშტაბური შეჭრის პირველ წელს 8%-ით გაიზარდა (140.3 მილიარდი რუბლი), ხოლო წმინდა მოგებამ 48.2 მილიარდი რუბლი შეადგინა, რაც 45%-ით მეტია, ვიდრე 2021 წელს.
უწყებაში აღნიშნეს, რომ სრულმასშტაბური ომის დასაწყისში კომპანიამ გამოაცხადა თავისი რუსული ბიზნესის გაყიდვის განზრახვა, მაგრამ, როგორც ჩანს, ყველა მცდელობა წარუმატებელი აღმოჩნდა, ამიტომ კორპორაცია რუსეთის ბიუჯეტში გადასახადის ერთ-ერთი უმსხვილესი გადამხდელია.