„დიდი შვიდეულის“ (G7) წევრი სახელმწიფოების მიერ უკრაინისათვის უსაფრთხოების გარანტიების მომზადებას მრავალი თვე დასჭირდება, ხოლო ზოგიერთი ორმხრივი შეთანხმება მომავალ წლამდე არ დაიდება. ინფორმაციას ამის შესახებ ამერიკული გაზეთი The Wall Street Journal-ი ევროპულ ოფიციალურ წყაროებზე დაყრდნობით ავრცელებს.
The Wall Street Journal-ის ცნობით, „დიდი შვიდეულის“ (G7) წევრ სახელმწიფოებს შორის არ არსებობს კონსენსუსი იმაზე, თუ რამდენად დეტალური უნდა იყოს უკრაინის წინაშე აღებული ვალდებულებები. გარდა ამისა, მათ უკრაინასთან უნდა გაარკვიონ, როგორი შეიძლება იყოს მისი სამომავლო სამხედრო საჭიროებები.
როგორც ამერიკული გაზეთი წერს, G7-მა კოორდინაცია უნდა გაუწიოს ორმხრივ მოლაპარაკებებს დასავლეთის დედაქალაქებს შორის და უზრუნველყოს, რომ მოკავშირეთა თავდაცვითი მრეწველობა შესძლებს უკრაინას მიაწოდოს დაპირებული სამხედრო დახმარება.
როგორც დასავლელი ოფიციალური პირები აღიარებენ, უკრაინის საიმედო მხარდაჭერის პაკეტების გარეშე, ნაკლებად სავარაუდოა, რომ რუსეთი თავს შეიკავებს ომის გაგრძელებისგან.
ისინი ასევე ასახელებენ პრობლემად დასავლეთის ქვეყნებში ხელისუფლების ცვლილების შემდგომ წლებში უკრაინის სამხედრო ხარჯების ეფექტურად განაწილებისა და დაცვის შესაძლებლობის საკითხს.
გაზეთი The Wall Street Journal-ის თანახმად, ევროპელი მოკავშირეები უკვე ემზადებიან იმისთვის, რომ ჯო ბაიდენის ადმინისტრაციის გრძელვადიანი დაპირებები იქნება მოსალოდნელზე სუსტი ან ძალიან ბუნდოვანი რუსეთის საიმედო შეკავების უზრუნველსაყოფად.
როგორც მასალაშია აღნიშნული, თუ ვაშინგტონი მნიშვნელოვნად შეამცირებს უკრაინის მხარდაჭერას, ნაკლებად სავარაუდოა, რომ ევროპამ შეავსოს ეს ხარვეზი ფინანსურად ან სამხედრო გზით, რადგან ის სერიოზული ფინანსური ზეწოლის წინაშე დგას და სულ რამდენიმე ედვროპულ ქვეყანას აქვს თავდაცვის ინდუსტრია, რომელიც შეედრება აშშ-ს.