ძლიერმა ნალექმა და ქარმა პრობლემები შექმნა დედაქალაქში, დაიტბორა ქუჩები, მიწისქვეშა გადასასვლელები, წაიქცა ხეები, დაზიანდა ელექტროსადენები, წყალმა კორპუსების სარდაფებშიც შეაღწია.
თბილისის მუნიციპალიტეტის ყველა შესაბამისი უწყება, შინაგან საქმეთა სამინისტროს საგანგებო სიტუაციების მართვის სამსახურთან ერთად, სრულად იყო მობილიზებული. სამაშველო სამსახურში გამოძახებები ძირითადად სარდაფებისა და მიწისქვეშა გადასასვლელების დატბორვის შესახებ შევიდა და მაშველებმა წყლის ამოტუმბვის სამუშაოები განახორციელეს. საგანგებო სიტუაციების მართვის სამსახურში დაშავებულთა შესახებ შეტყობინება არ შესულა. თბილისის მერიამ მოსახლეობას სახლში დარჩენისკენ მოუწოდა, ამოქმედა მერიის ცხელი ხაზი.
თბილისის მერი კახა კალაძე დედაქალაქში ძლიერი წვიმით გამოწვეულ შედეგებს ადგილზე გაეცნო. მისი თქმით, მიუხედავად იმისა, რომ სანიაღვრე სისტემა ფუნქციონირებს, ჭარბმა ნალექმა სხვადასხვა ადგილზე პრობლემები მაინც შექმნა.
შესაბამისი სამსახურები პრობლემურ ადგილებზე მთელი ღამის განმავლობაში მუშაობდნენ.