მათ აქვთ მარტივი გათვლა – თუ უფრო მეტი ადამიანი დასაქმდება, მეტი ფული შემოვა ქართულ ეკონომიკაში, უფრო მეტად შესუსტდება მათი პოზიციები და ხელისუფლების პოზიციები გაძლიერდება. აქედან გამომდინარეობს ის საბოტაჟი, რომელიც წარმოებს იგივე რუსთავის საკრებულოში, – ამის შესახებ პარტია „ქართული ოცნების“ თავმჯდომარემ, საპარლამენტო უმრავლესობის ლიდერმა, ირაკლი კობახიძემ ჟურნალისტებს განუცხადა.
მისივე თქმით, რადიკალური ოპოზიციის წარმომადგენლები თბილისშიც უპირისპირდებიან ნებისმიერ პროექტს, რომელიც განვითარებას უკავშირდება.
„გახსოვთ, როგორ წარიმართა რამდენიმე დღის წინ პროცესები თბილისის საკრებულოში. თბილისისა და ქვეყნისთვის რამდენიმე ძალიან მნიშვნელოვანი პროექტი იყო გატანილი თბილისის საკრებულოს სხდომაზე და აბსოლუტურად ყველას დაუპირისპირდა რადიკალური ოპოზიცია. რატომ? რადგან მათთვის მშენებლობა, შენება ნიშნავს საკუთარი პოზიციების შესუსტებას. საუბარია მილიარდ დოლარზე მეტი ინვესტიციის შემოსვლაზე საქართველოში, ადამიანების დასაქმებაზე. საბოლოო ჯამში, მათ აქვთ მარტივი გათვლა – თუ უფრო მეტი ადამიანი დასაქმდება, მეტი ფული შემოვა ქართულ ეკონომიკაში, უფრო მეტად შესუსტდება მათი პოზიციები და ხელისუფლების პოზიციები გაძლიერდება. აქედან გამომდინარეობს ის საბოტაჟი, რომელიც წარმოებს იგივე რუსთავის საკრებულოში. საბოლოო ჯამში, ისინი შედეგს ვერ მიაღწევენ. ყველა პროექტი სათანადოდ განხორციელება, რადგან ეს სჭირდება ჩვენს ქვეყანას, თბილისს, რუსთავსა და ჩვენს თითოეულ ქალაქს“, – აღნიშნა ირაკლი კობახიძემ.