რუსეთისა და ბელარუსის ელჩების ნობელის პრემიის დაჯილდოების ბანკეტზე მიწვევამ შვედი პოლიტიკოსების მხრიდან მწვავე კრიტიკა გამოიწვია. ინფორმაციას ამის შესახებ ტელეკომპანია CNN-ი ავრცელებს.
აღსანიშნავია, რომ გასულ წელს უკრაინაში რუსეთის შეჭრის გამო რუსეთისა და ბელარუსის ელჩები არ იყვნენ მიწვეულნი ღონისძიებაზე. თუმცა, ნობელის ფონდში აცხადებენ, რომ მათ სურთ ჩართონ ისინიც კი, ვინც არ იზიარებს ნობელის პრემიის ღირებულებებს.
„აშკარაა, რომ სამყარო სულ უფრო მეტად იყოფა სფეროებად, სადაც მცირდება დიალოგი განსხვავებული შეხედულებების მქონე ადამიანებს შორის“, – განაცხადა ნობელის ფონდის აღმასრულებელმა დირექტორმა, ვიდარ ჰელგესენმა.
შვედეთის პრემიერ-მინისტრმა, ულფ კრისტერსონმა განაცხადა, რომ არ ელოდა, რომ ნობელის ფონდი რუსეთს მიიწვევდა წლევანდელ ღონისძიებაზე.
შვედეთის რამდენიმე ოპოზიციური პარტიის ლიდერმა გააუქმა მიწვევა, ხოლო ხელისუფლების წარმომადგენლები ღონისძიებაში მონაწილეობაზე უარის თქმას განიხილავენ.
ნობელის პრემიის ბანკეტი ყოველწლიურად იმართება სტოკჰოლმში 10 დეკემბერს.