კონსტიტუცია უხეშად დაირღვა და ამის რეაგირების გარეშე დატოვება მმართველი გუნდის მხრიდან იქნებოდა უბრალოდ უპატივცემულობა საქართველოს კონსტიტუციის მიმართ, როდესაც უხეშად ირღვევა კონსტიტუცია, მით უმეტეს საქართველოს პრეზიდენტის მიერ, ასეთ დროს, მმართველი გუნდის პასუხისმგებლობაა, რომ ქმედითი რეაგირება განახორციელოს ასეთ უხეშ ქმედებაზე, – ამის შესახებ „ქართული ოცნების“ თავმჯდომარემ, ირაკლი კობახიძემ განაცხადა.
მისი თქმით, დოკუმენტაცია გროვდება და სავარაუდოდ ორშაბათს წარედგინება საკონსტიტუციო სასამართლოს.
„სწორედ ამის გამო დავიწყეთ იმპიჩმენტის პროცედურა, მიუხედავად იმისა, რომ მმართველ გუნდს არ აქვს 100 ხმა ამ პროცესის ბოლომდე მისაყვანად. მიუხედავად იმისა, რომ კოლექტიური „ნაცმოძრაობა“ სალომე ზურაბიშვილს თავის დროზე აცხადებდა ჯაშუშად, მოღალატედ, რეზიდენტად და ა.შ. დღეს ისინი ატარებენ ერთ დღის წესრიგს. აქედან გამომდინარე, რა თქმა უნდა, ისინი მხარს არ დაუჭერენ იმპიჩმენტის პროცედურას. ანუ, მათ მიერვე ჯაშუშად გამოცხადებულ პრეზიდენტს, დატოვებენ პრეზიდენტის თანამდებობაზე, რაც მეტყველებს ზოგადად მათ ბუნებაზე და მათი დღის წესრიგის ბუნებაზე. პროცედურას რაც შეეხება, ხელმოწერები თითქმის შეგროვებულია, დღეს დასრულდება ეს პროცესი. ასევე, დოკუმენტაციის სრულყოფაც მოხდება მაქსიმუმ ხვალამდე და ამის შემდეგ უკვე საპროცედურო კომიტეტს გადაეგზავნება დოკუმენტაცია, რის შემდეგაც გაიმართება საპროცედურო კომიტეტის სხდომა რეგლამენტის შესაბამისად. როგორც კი კომიტეტი დაადასტურებს ხელმოწერების ნამდვილობას, მაშინვე უკვე ოფიციალურად წარედგინება ეს დოკუმენტაცია, ანუ კონსტიტუციური წარდგინება საკონსტიტუციო სასამართლოს. ეს არის რეალურად დღეების საქმე. იმის მიხედვით, თუ როდის გაიმართება კომიტეტის სხდომა, მაქსიმუმ ორშაბათს უკვე ოფიციალურად წარედგინება ეს დოკუმენტაცია საკონსტიტუციო სასამართლოს“, – განაცხადა კობახიძემ.