უკრაინის უმაღლესმა რადამ პარლამენტის საგამოძიებო კომიტეტის მიერ მომზადებული ანგარიში გამოაქვეყნა, რომელშიც ჰუმანიტარული დახმარების შესაძლო მოპარვაზეა საუბარი. გავრცელებული ინფორმაციით, კომისია ამ საკითხს ერთი წლის განმავლობაში იკვლევდა და საბოლოოდ 88-გვერდიანი დასკვნა დადო.
დოკუმენტში ნათქვამია, რომ მინისტრთა კაბინეტის მიერ გამოცემული ნორმატიულ-სამართლებრივი აქტები, რომლებიც ჰუმანიტარული ტვირთების მიღება-განაწილების პროცედურებს შეეხებოდა, ხშირ შემთხვევაში ეწინააღმდეგება „ჰუმანიტარული დახმარების შესახებ“ უკრაინის კანონს. კომისიამ სამხედრო-ადმინისტრაციულ ოლქებში ჰუმანიტარული დახმარების მიღება-განაწილებისა და ტრანსპორტირების პროცესში არაერთი დარღვევა გამოავლინა. როგორც ირკვევა, ჰუმანიტარული დახმარების დიდ ნაწილზე სახელმწიფოს მხრიდან სათანადო კონტროლი არ ხორციელდებოდა, რის შედეგადაც ტვირთის დაკარგვის ასობით ფაქტი გამოვლინდა. უფლებამოსილების ბოროტად გამოყენების ფაქტებზე მოკვლევა კი საგამოძიებო ორგანოების მიერ ეფექტურად არ ხორციელდება.
აღსანიშნავია, რომ ზაფხულში უკრაინის თავდაცვის სამინისტროს შიდა აუდიტმა სამხედროებისთვის განკუთვნილი ჰუმანიტარული დახმარების გაუჩინარების 650-მდე შემთხვევა დააფიქსირა. ჰუმანიტარული ტვირთის გაყიდვის ფაქტები გამოავლინა უკრაინის ეკონომიკური უსაფრთხოების ბიურომაც.