ნებისმიერი მოქმედება, რომელიც მიმართული იქნება სტატუსის წინააღმდეგ, არის მოღალატეობრივი. პოლიტიკოსისთვის მთავარი ინსტრუმენტი არის განცხადება და ის, რა შესაძლებლობაც მათ ჰქონდათ, ყველაფერი გამოიყენეს, რომ საქართველოსთვის სტატუსის მიღების პროცესში პრობლემები შეექმნათ, – ამის შესახებ ფრაქცია „ქართული ოცნების“ თავმჯდომარის მოადგილემ, ირაკლი ჩიქოვანმა გადაცემა „იმედი LIVE“-ში განაცხადა.
მისივე თქმით, დღეს ოპოზიციის წარმომადგენლებმა სანდოობა დაკარგეს.
„ხელისუფლებამ ყველაფერი გააკეთა იმისთვის, რომ კანდიდატის სტატუსი ერთი წლისთავზე დაემსახურებინა. ხათუნა სამნიძის წამოცდენას თუ გარკვეულწილად გულახდილობას, დავამატებდი იმას, რომ არ ვარ დარწმუნებული, თვითონ ეს სუბიექტებიც თავის დროზე ამ ყველაფერში ჩართულები არ იყვნენ, თვითონ არ იყვნენ მოწინააღმდეგეები სტატუსის მინიჭებისა. წელიწადზე მეტია, რაც ჩვენ რეკომენდაციებზე ვმუშაობთ და ყოველ ჯერზე, როდესაც კომუნიკაცია იყო, ჩვენ ვხედავდით რომ ადამიანები, რომლებსაც გარკვეული წვდომა ჰქონდათ დერეფნებში, პოლიტიკოსებთან, ყველაფერს აკეთებდნენ, რომ ერთი მხრივ არ მიგვეღო სტატუსი და ეს გამოეყენებინათ ქვეყანაში რადიკალიზაციისთვის და მეორე მხრივ ხაზი გაევლოთ ხელისუფლებასა და მოქალაქეებს შორის“, – აღნიშნა ირაკლი ჩიქოვანმა.
„რესპუბლიკური პარტიის“ თავმჯდომარის, ხათუნა სამნიძის განცხადებით, ოპოზიციის რიგებში არიან პოლიტიკოსები, რომლებიც კანდიდატის სტატუსის მინიჭების პროცესს ხელს უშლიან.