ყველა ქვეყნისგან დადასტურება მივიღეთ საქართველოს ტერიტორიული მთლიანობის, რომ არაღიარების პოლიტიკიდან არ გადაუხვევენ, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა, ლუანდაში, სადაც მსოფლიო საპარლამენტო კავშირის 147-ე ასამბლეაში მონაწილეობს.
მისივე თქმით, შეხვედრები აქვთ იმ ქვეყნებთანაც, რომლებიც გაერო-ში რეზოლუციას ხმას, ან წინააღმდეგ აძლევენ, ან თავს იკავებენ, ან კენჭისყრას არ ესწრებიან.
„ერთი მხრივ, საქართველოს საპარლამენტო დელეგაცია ასამბლეაში მონაწილეობას აგრძელებს, მეორე მხრივ, ორმხრივ შეხვედრებს იმ ქვეყნებთან მართავს, ვისთანაც მნიშვნელოვანია მუშაობა არაღიარების პოლიტიკის სახით და გაერო-ში საქართველოს თაობაზე რეზოლუციის მხარდაჭერის თვალსაზრისით. ჩვენ შეხვედრები იმ ქვეყნებთან გვქონდა, რომლებმაც საქართველოს ბოლო პერიოდში დაუჭირეს მხარი. ჩვენი მიზანია, ეს მხარდაჭერა გამყარდეს. ასევე შეხვედრებია იმ ქვეყნებთან, რომლებიც გაერო-ში რეზოლუციას ხმას, ან წინააღმდეგ აძლევენ, ან თავს იკავებენ, ან კენჭისყრას არ ესწრებიან. ყველასთან გვქონდა საუბარი, რომ ეს საკითხი მნიშვნელოვანია მათთვისაც, რადგან საერთაშორისო სამართლის პრინციპების დაცვა, საბოლოო ჯამში, გავლენას ახდენს ყველა ქვეყანაზე. ქვეყნებმა, რომელთაც გაერო-ში საქართველოს მხარი დაუჭირეს, დაგვიდასტურეს, რომ ამ მხარდაჭერას გააგრძელებენ. რაც შეეხება არაღიარების პოლიტიკას, ყველა ქვეყნისგან დადასტურება მივიღეთ როგორც საქართველოს ტერიტორიული მთლიანობის, ასევე, იმის, რომ ისინი არ გადაუხვევენ არაღიარების პოლიტიკიდან. შესაბამისად, საქართველოს ტერიტორიულ მთლიანობას პატივს სცემენ. ასეთი ღონისძიებები შესაძლებლობას იძლევა, სადაც დიპლომატიური წარმომადგენლობა არ გვაქვს და მათთან კომუნიკაცია გეოგრაფიულადაც რთულია, ასეთ ფორმატებში უშუალო კომუნიკაცია გვქონდეს და პარლამენტებს შორის ხიდის გადება მოვახდინოთ, რაც შემდგომ ურთიერთობებისთვის, ქვეყნის საგარეო მიზნებისა და ამოცანების ეფექტიანად მიღწევაში დაგვეხმარება“, – განაცხადა პაპუაშვილმა.