ევროკომისიის ანგარიში გაფართოების შესახებ 8 ნოემბერს გამოქვეყნდება. კანდიდატის სტატუსზე ურთიერთბრალდებები გრძელდება. მმართველი გუნდი ოპოზიციის შეცვლილ რიტორიკაზე საუბრობს. იგივე თემაზე აკეთებს აქცენტს ოპოზიციის ნაწილიც, რომელიც პირდაპირ ადასტურებს, რომ ბრიუსელში მათი ზოგიერთი კოლეგის შეხვედრების თემა, ხშირ შემთხვევაში, კანდიდატის სტატუსის გადავადებას ეხება.
„ოცნებაში“ იხსენებენ იმასაც, როგორი იყო ამ თემაზე მანამდე, მათი ოპონენტების გზავნილები, რომლებიც, სტატუსის მიღების შემთხვევაში, ქვეყნისთვის სარგებელზე საუბრობდნენ, ახლა კი მის გაუფასურებას ცდილობენ.
მმართველი გუნდი ამბობს, რომ ოპოზიციის შეცვლილი რიტორიკა უკავშირდება სტატუსთან დაკავშირებულ მოლოდინს, რომელიც პოზიტიურია და რომელიც ოპოზიციას არ აწყობს.
ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარის, მიხეილ სარჯველაძის განცხადებით, ხელისუფლების ნებისმიერი წარმატებას ოპოზიციის ნაწილი წარუმატებლობად იღებს, მიუხედავად იმისა, რომ შესაძლოა, ეს ქვეყნის ინტერესებში შედიოდეს.
“ქვეყნის წარმატება-წარუმატებლობის საკითხი ფასდება იმის მიხედვით, ხელსაყრელი იქნება თუ არა პოლიტიკური დისკუსიისთვის. ამიტომ, ნებისმიერი წარმატება ხელისუფლების პირობებში, ოპოზიციის დიდ ნაწილის მხრიდან, აღიქმება, როგორც მათი პირადი წარუმატებლობა. მათი პირადი წარმატება არის უფრო მეტად ღირებული, ვიდრე – ქვეყნის წარმატება. ხელისუფლება დაზარალდეს, მიუხედავად იმისა, რომ ამით ქვეყანა დაზიანდება, ეს ყველაფერი მათთვის დასაშვები ხდება, იმ ფონზე, თუ ამით პოლიტიკურად ქულებს დაიწერენ“, – განაცხადა მიხეილ სარჯველაძემ.