საქართველოს ეროვნული ბანკის პრეზიდენტის მოვალეობის შემსრულებელი ნათია თურნავა საქართველოში საფრანგეთის ელჩს, შერაზ გასრის შეხვდა. ინფორმაციას ეროვნული ბანკი ავრცელებს.
მათივე ცნობით, ნათია თურნავამ საფრანგეთის ელჩს კიდევ ერთხელ დაუდასტურა, რომ საქართველოს ეროვნული ბანკი და ფინანსური სისტემა საერთაშორისო სანქციების ერთგული რჩებიან.
„შეხვედრაზე სებ-ის პრეზიდენტის მოვალეობის შემსრულებელმა ელჩს დეტალურად გააცნო ინფორმაცია ეროვნული ბანკის საქმიანობის ძირითადი მიმართულებებისა და პრიორიტეტების შესახებ.
გაცნობით შეხვედრაზე საუბარი ორმხრივი თანამშრომლობის გაღრმავებასა და საქართველოს ევროპული პერსპექტივის მხარდაჭერას შეეხო. განსაკუთრებული ყურადღება გამახვილდა ერთიანი ევრო გადახდების სივრცეში (SEPA) საქართველოს გაწევრიანებასთან დაკავშირებულ ნაბიჯებზე, რაც უმნიშვნელოვანესია საქართველოს ევროინტეგრაციის გზაზე“,- აღნიშნულია ეროვნული ბანკის ინფორმაციაში.