აშშ-ის სახელმწიფო დეპარტამენტის სპიკერმა “ჰამასი” საწვავის დიდი მარაგების შეკავებაში დაადანაშაულა – იმ დროს, როდესაც ის ესაჭიროება მოსახლეობას და საავადმყოფოებს.
მეთიუ მილერმა ბრიფინგზე თქვა, რომ საწვავი საჭიროა გენერატორებისთვის, რომლებიც ელექტროენერგიას აწვდიან ღაზას სექტორში მდებარე საავადმყოფოებსა და გამწმენდ ქარხნებს.
„და ჩვენ გვინდა, რომ ამ მიზნებისთვის საწვავი რაც შეიძლება სწრაფად იყოს მიწოდებული. უნდა აღვნიშნო, რომ იმ დროს, როდესაც ჩვენ ვმუშაობთ საწვავის მიწოდებაზე კრიტიკული ჰუმანიტარული სამსახურებისთვის, “ჰამასი” საწვავის დიდი მარაგის შენარჩუნებას აგრძელებს. იმის ნაცვლად, რომ საწვავი ჰუმანიტარულ ორგანიზაციებს, ან სხვა სამოქალაქო საჭიროებებისთვის გადაეცეს, ისინი ინახავენ მას თავიანთი მებრძოლებისთვის და ისრაელის წინააღმდეგ ტერაქტების მოსაწყობად”, – თქვა მილერმა.
მისი თქმით, 29 ოქტომბერს რაფაჰის სასაზღვრო პუნქტით ღაზაში 45 სატვირთო მანქანა შევიდა, ხოლო 30 ოქტომბერს -39 სატვირთო.
„ჩვენ ვაღიარებთ, რომ საჭიროებები უზარმაზარია და გვსურს, უზრუნველვყოთ საკვების, წყლისა და მედიკამენტების მუდმივი მიწოდება ღაზაში. ჩვენ ამის მისაღწევად დაუღალავად გავაგრძელებთ მუშაობას დიპლომატებთან ისრაელთან, ეგვიპტესთან, გაეროსთან და საერთაშორისო ჰუმანიტარულ ორგანიზაციებთან პარტნიორობით“, – თქვა აშშ-ის სახელმწიფო დეპარტამენტის წარმომადგენელმა.