“ხალხი ძალის” წევრი, გურამ მაჭარაშვილი საქართველოს პრეზიდენტის, სალომე ზურაბიშვილის ინტერვიუს გამოეხმაურა.
მისი შეფასებით, ზურაბიშვილი კანდიდატის სტატუსის საწინააღმდეგო განცხადებებს აკეთებს.
“ეს ინტერვიუ კიდევ ერთი მტკიცებულებაა იმისა, თუ რატომ არ აძლევდა საქართველოს მთავრობა თანხმობას პრეზიდენტს უცხოეთში ვიზიტებთან დაკავშირებით, სადაც ის პრაქტიკულად აშავებს საქართველოს და კანდიდატის სტატუსის საწინააღმდეგო განცხადებებს აკეთებს.
ძალიან მნიშვნელოვანია, რომ ქართული საზოგადოების გარდა, ჩვენმა პარტნიორებმა იცოდნენ, რომ საქართველოს სამწუხაროდ ჰყავს პრეზიდენტი, რომელიც გავიდა საკონსტიტუციო წესრიგის სფეროდან“, – აღნიშნა მაჭარაშვილმა.
ცნობისთვის, საქართველოს პრეზიდენტი სალომე ზურაბიშვილი CBS NEWS-თან ინტერვიუში კითხვას – “ისე ჩანს, რომ პრემიერ-მინისტრი არ არის დაინტერესებული ევროკავშირში გაწევრიანებით?”, პასუხობს – “ეს ის კითხვაა, რომელსაც მთელი საზოგადოება სვამს: – ეს [ევროკავშირში გაწევრიანება] ისაა, რაც მათ [მთავრობას] ნამდვილად სურს, თუ ეს მხოლოდ სიტყვებია?”.